“ပျော်ရွှင်သောဘ၀”

“ဘ၀” ဆိုတာ ကိုယ်ဖြစ်စေချင်တာကို ဖြစ်စေဖို့ မွေးဖွားလာခဲ့ခြင်း မဟုတ်ပါဘူး။ သို့ပေမယ့်လည်း ဖြစ်ချင်တာကို ဖြစ်သင့်သလောက်တော့ ရှာဖွေလုပ်ယူရပါလိမ့်မယ်။ ဘယ်လိုရအောင် လုပ်ယူကြမလဲ။  တိကျတဲ့ အကြောင်းရင်းတွေကတော့ ရှိနေပါသည်။

ကျွန်တော်တို့အရင်ဆုံး ပျော်ရွှင်မှုကို ရှာဖွေစူးစမ်းကြပါစို့။ ပျော်ရွှင်မှုကို လူတိုင်းရဖူးကြပါသည်။ သို့ပေမယ့် စစ်မှန်တဲ့ ပျော်ရွှင်မှုကို ဖန်တီးဖို့ရာ လမ်းပျောက်နေတတ်ကြပါသည်။ စစ်မှန်တဲ့ ပျော်ရွှင်မှုဆိုတာ ဘ၀ရဲ့ အနှစ်သာရ အလှအပတခုပါပဲ။ ရွှေငွေပိုင်ဆိုင်မှုတွေ အများကြီးရှိမယ်၊ ပျော်ရွှင်မှုတွေ မရှိဘူးဆို ပိုင်ဆိုင်ရသမျှဟာ အလကားပါပဲ။ ပျော်ရွှင်မှုဆိုတာ လူတစ်ယောက်ရဲ့ ရွေးချယ်စီမံမှုတွေကနေ တဆင့်ပေါက်ဖွားလာခြင်းပါ။ ပျော်ရွှင်မှုသည် ကြီးကျယ် ခမ်းနားလှပါတယ် ဆိုသော အရာတွေဆီက မလာပါဘူး။ ကျွန်တော်တို့ရဲ့ နေ့စဉ် ဖြစ်တည်နေသော ဘ၀တွေကနေသာ လာခြင်းဖြစ်ပါသည်။ ပျော်ရွှင်မှုသည် ဘ၀ရဲ့အခြေခံ အရင်းအမြစ်တခုလို့ ပြောလို့လည်းရပါသည်။ ပျော်ရွှင်မှုရဲ့ အဓိပ္ပါယ်ကို များစွာဖော်ပြနေခြင်းထက် နေ့စဉ်ဘ၀တွေကနေ့ ဘယ်လိုဖန်တီးယူရမယ် ဆိုတာ သိရှိဖို့လိုအပ်ပါမည်။  ပျော်ရွှင်မှုကို လက်ငင်းချက်ခြင်း ဖန်တီးယူဖို့ဆိုတာ မဖြစ်နိုင်ပါဘူး။ ဆိုလိုတာက တဖြည်းဖြည်းခြင်း တဆင့်ထက်တဆင့် တိုးမြှင့်သွားမှသာ  နည်းလမ်းမှန်ကန်တဲ့ ပျော်ရွှင်မှုတွေ ရရှိနိုင်မှာ ဖြစ်ပါသည်။

ယခုလို ပြုလုပ်ယူဖို့ဆိုရင်တွင် ပျော်ရွှင်မှုမှာ အနည်းဆုံး ရှိရမယ့်အရာတွေက ဘာတွေလဲဆိုတာ ကျွန်တော်တို့ တွေးယူကြည့်ကြပါစို့။ စစ်မှန်ပြီး တန်ဖိုးရှိသော ပျော်ရွှင်ခြင်းတွေကစလို့ ကောင်းမွန်တဲ့ အပြုအမူတွေ၊ စစ်မှန်သော ခံစားမှုတွေကို စိတ်ရင်းစေတနာသန့်သန့် တွေထားပြီး ရည်မှန်းထားတဲ့ ပန်းတိုင်တွေ ဆီလျှောက်လှမ်းခဲ့မယ်ဆိုရင်ဖြင့် ပျော်ရွှင်မှုက မျှော်မှန်းမထားလည်းပဲ သူ့အလိုလိုကို ရောက်ရှိလာပါလိမ့်မည်။ စစ်မှန်သောပျော်ရွှင်ခြင်းတွေမှာ ဘာတွေ့ပါဝင်ပေါင်းစပ်ရမလဲ။ မေတ္တာ၊ လှပတဲ့ အာရုံ၊ တွေးတောလုပ်ဆောင်မှုတွေနဲ့ လက်တွေ့ပါဝင်နေတဲ့ လှုပ်ရှားမှုတွေ၊ တရားမျှတမှုတွေ၊ သတ္တိအစွမ်းတွေ၊ လူသားခြင်းစာနာရိုင်းပင်းမှုတွေ၊ ရဲရင့်ပြတ်သားမှုတွေပေါ့။ ဤအရာတွေက မပါဝင်လို့ကို မဖြစ်နိုင်ပါဘူး။ ကောင်းမွန်တဲ့ အပြုအမူတွေကကော။ ဗဟုသုတတွေ အတွေ့အကြုံတွေ ဝေမျှခြင်း၊ လူမှုအဖွဲ့အစည်းတွေမှာ ပါဝင်လုပ်ဆောင်ခြင်း စသည်ဖြင့်ပေါ့ ဆောင်ရွက်နိုင်ပါသည်။  စိတ်ပျက် အားငယ်နိုင်တာတွေ၊ ကိုယ့်တိုးတက်မှုကို ပျက်ပြားစေနိုင်တဲ့ ခံစားမှုတွေမရှိဖို့လည်း လိုအပ်ပါသည်။  ယဉ်ကျေးပြူငှာတဲ့ ဆက်ဆံမှု၊ ရှေ့နောက်တွေးခေါ်စဉ်းစားတတ်တဲ့ စိတ်တွေကိုအမြဲ နှလုံးသွင်းထားရပါမယ်။ ဒီလိုဆိုရင်ဖြင့် ရှေ့ဆက်သွားမယ့် အနာဂါတ်ခရီးလမ်းမှာ မည်သူတစ်ဦးတစ်ယောက် အပေါ်ကိုမှ ထိခိုက်စေခြင်းမရှိပဲ တိကျတဲ့ ပန်းတိုင်ဆီ အရောက်သွားနိုင်ပြီပေါ့။ ကျွန်တော်တို့ ယုံကြည်သင့်ပါတယ်။  အနာဂါတ်ဟာ သင့်လျော်တဲ့ အရာတွေနဲ့ တွေ့ကြုံမှုတွေကို အမြဲကမ်းလင့်နေမယ်ဆိုတာ။ ကောင်းမွန်တဲ့ အစီအစဉ်တွေသာ ရှိနေမယ်ဆို အကောင်းဆုံး ရွေးချယ်မှုတွေနဲ့ ညီမျှမှန်ကန်အောင် ဆောင်ရွက်သွားနိုင်မှာပါ။

တခြားလူတွေရဲ့ အတွေ့အကြုံတွေထဲက ကောင်းမွန်တဲ့ အရာတွေကို သင်ယူပါ။ နောက်ပြီး ကိုယ်ပိုင် တွေးခေါ်မှုတွေ ကိုယ်ပိုင် ဆုံးဖြတ်ချက်တွေကို အကောင်အထည်ဖော်ပါ။ အစီအစဉ်တွေ ကြိုတင်ချခြင်းဖြင့်လည်း အချိန်ကို ထိန်းသိမ်းနိုင်မယ့်အပြင် လုပ်ရမည့် အလုပ်တွေအတွက်လည်း အချိန်ပိုရလာနိုင်ပါသည်။ ဤသို့ဆိုရင်ဖြင့် ပြည့်စုံတဲ့ကောင်းမွန်တဲ့ စိတ်တွေ အလေ့အကျင့်တွေကို မည်သည့်တားဆီးမှုတွေ ရှိလာပါစေ မုချကျော်ဖြတ်နိုင် လာပါလိမ့်မယ်။

ရိုးရှင်းသောပျော်ရွှင်မှုရဲ့ နည်းလမ်းလေးတွေကိုလည်း မှတ်သားထားသင့်ပါသည်။  ထိုအရာတွေကတော့ ကြောက်ရွံ့ထိတ်လန့်ခြင်းက လွတ်မြောက်ပါစေ၊ စိုးရိမ်ပူပန်ခြင်းမှ လွတ်မြောက်ပါစေ၊ ရိုးရိုးရှင်းရှင်းလေးနေပါ၊ များများပေးကမ်းပါ၊ နဲနဲပဲ မျှော်လင့်ပါ ရည်ရွယ်ချက်တော့ မထိခိုက်ပါစေနဲ့။ မည်သူတစ်ဦးတစ်ယောက်မှ စခဲ့တဲ့ အတိတ်ကို ပြန်မသွားနိုင်ပါဘူး။ မည်သူမဆို ယခုလက်ရှိ ပစ္စုပ္ပန်ကစလို့ အသစ်အသစ်သော အနာဂါတ်တွေဆီကို အဆုံးမရှိသွားနိုင်မှာ ဖြစ်ပါတယ်။ ရွေးချယ်မှုမှန်ကန်ဖို့တော့ လိုအပ်ပါတယ်။ စိတ်ပျက်မှုဆိုတာ တားဆီးပိတ်ပင်နေတဲ့ လမ်းဆိုးလမ်းညစ်တွေလိုပါပဲ။ သူတို့ဟာ ကျွန်တော်တို့ရဲ့ လမ်းကိုနှောင့်နှေးစေပေမယ့် သူတို့ရဲ့ တခြားတဖက်မှာ ဖြောင့်ဖြူးနေတဲ့ လမ်းတွေက ကျွန်တော်တို့ကို ပျော်ရွှင်စေမှာပါ။ တနေရာမှာပဲ အကြာကြီးရပ်မနေပါနဲ့။ ရွှေ့ပါ.. ရွေ့ပါ.. တစ်လှမ်းဆိုတစ်လှမ်းခြင်းရွှေ့သွားပါ။ ဘာတွေပဲ ဖြစ်လာဖြစ်လာ ကောင်းသည်ဖြစ်စေ ဆိုးသည်ဖြစ်စေ ဖြစ်ရတဲ့ အကြောင်းရင်းကို စဉ်းစားပါ။ ဤအရာတွေက ကျွန်တော်တို့ ဘ၀အတွက် သင်ယူ၊ ပြင်ဆင်ယူရမယ့် အဖြစ်အပျက်သင်ခန်းစာတွေပါ။ ပျော်ရွှင်စွာ ရီမောတတ်စေဖို့ ငိုကြွေးမှုတွေနည်းစေဖို့ သင်ခန်းစာ ပြဋာန်းချက်အသစ်တွေကို ရလိုက်တယ်လို့ သဘောထားပါ။

ပျော်ရွှင်မှုတွေကို ရရှိလာအောင် ဘယ်လိုပြောင်းလဲသင့်လဲဆိုတဲ့ အချက်တွေကိုလည်း ပြောပြချင်ပါသည်။ အလုပ်ကို ကြိုးကြိုးစားစားနဲ့ ဖန်တီးယူပါ ပြုလုပ်ပါ။ ပြောချင်တာကတော့ အလုပ်မှာ စိတ်ပါဝင်စားစွာနဲ့လုပ်ပါ။ ဒီအလေ့အကျင့်တွေဟာ စိတ်ရှုပ်ထွေးမှုတွေကို တခဏသာ မေ့ပျောက်ထားနိုင်ပါသည်။ အလုပ်လုပ်ခြင်းကြောင့် အောင်မြင်လာပြီး တိုးတက်လာတာနဲ့အမျှ ပျော်ရွင်လာပြီး အလုပ်ကိုလည်း ပိုတိုးလို့ လုပ်ဆောင်နိုင်လာမှာပါ။ အရမ်းပင်ပန်းနေပါလား၊ စိတ်တွေထွေပြီး ရှုပ်ထွေးနေပါလား။ စိတ်အပန်းဖြေလိုက်ပါ။ ခရီးထွက်လိုက်ပါ။ မရောက်ဘူးတဲ့နေရာ မသွားဖူးတဲ့ နေရာအသစ်တွေကို သွားလိုက်ပါ။ ဥပမာ အားကစားကွင်းကြိုက်ရင် ကစားပြီး အပန်းဖြေလိုက်ပါ။ သီချင်းတွေ အော်ညီးပြစ်လိုက်ပါ။ ဒါတွေဟာ နေထိုင်မှုစတိုင်ကို တမျိုးတဖုံ ပြောင်းလဲပစ်လိုက်ခြင်းပဲပေါ့။ ပျော်ရွှင်မှုအရာတွေကို တွေးမယ်ဆိုရင် ဒါမှမဟုတ် ပျော်ရွှင်အောင်ပြုလုပ်မယ်ဆိုရင် မပျော်ရွှင်နိုင်မယ့် အတွေးတွေကို နေရာမှာတင် ရပ်လိုက်ပါ။ သင့်ရဲ့ အသက်ရှင်နေထိုင်မှုအတွက် အရာရာကို ကျေးဇူးတင်လိုက်ပါ။ ကျေးဇူးတင်လိုက်ခြင်းဖြင့် သင့်ဘ၀ရဲ့ နေထိုင်မှု အခွင့်အရေးတွေ ထပ်ပြီးရရှိလာပါလိမ့်မယ်။ ကျေးဇူးတရားဟာ သင်လက်ခံတတ်ရင် ပျော်ရွှင်မှုရဲ့ ခေါင်းဆောင်ကောင်း တစ်ယောက်ပါပဲ။ ပျော်ရွှင်အောင်ပြုမူခြင်းဖြင့် သင်ဟာ ပျော်ရွှင်မှုကို လက်ခံလာပြီး ပိုပျော်ရွှင်လာလေ ပိုပျော်တတ်လာလေ ဖြစ်မှာ မလွဲဧကန်ပါ။

ယခုလို ပြောင်းလဲပစ်လိုက်ခြင်းဖြင့် ဘ၀ရဲ့ နေထိုင်မှုတွေမှာ ဘယ်လိုပြောင်းလဲ လာစေနိုင်ပါသလဲ။ လောကမှာ လူအများစုဟာ မပျော်ရွှင်ကြပါဘူး။ ဒီလောကကြီးက သူတို့ အတွက် ဆိုးကြိုးတွေ ကံမကောင်းမှုတွေသာ ယူဆောင်လာပေးတယ်လို့ ထင်နေတတ်ကြပါသည်။ သူတို့တွေဟာ ပျော်ရွှင်အောင်နေတတ်ဖို့ထက် ရယူပိုင်ဆိုင်လိုမှုတွေသာ ကြီးစိုးနေကြလို့ပါ။ ဒါကြောင့် စိတ်တွေဟာ အားငယ်စိတ်ပျက်ခြင်းတွေနဲ့ပဲ ကျန်းမာရေးကို ထိခိုက်လာတော့တာပေါ့။ ကျန်းမာမှသာလျှင်ဖြင့်လည်း ပျော်ရွှင်အောင် နေတတ်မှာပါ။ ပျော်ရွှင်မှုကို ရှာတတ်မှပါလည်း ကျန်းမာလာမှာပါ။

တစ်ဦးပေါ်တစ်ဦး ဝေမျှခြင်းသည်လည်း ပိုပျော်ရွှင်စေနိုင်သော အရာတခုပါပဲ။ ကိုယ်သိသလောက် တတ်သလောက် ဝေမျှခြင်းဖြင့် တစ်စုံတစ်ယောက် အဆင်ပြေသွားခဲ့မယ်။ လမ်းမှန် ရောက်သွားခဲ့မယ်ဆိုရင် ဘာနဲ့မှအစားထိုးမရအောင် ပျော်ရွှင်မိမှာပါ။ စိတ်ဖိစီးမှုဆိုတာတွေကလည်း ပျော်ရွှင်မှုကို နှောင့်ယှက်နိုင်တဲ့ ရန်သူတစ်မျိုးပါပဲ။ ကျွန်တော်တို့တွေဟာ အလွန်ခက်ခဲတဲ့ အခြေအနေတွေနဲ့ ဘ၀မှာ ရင်ဆိုင်နေကြရတယ်။ ဒီလိုဖြတ်သန်းရင်းနဲ့ပဲ ရှင်သန်နေကြရတယ်။ ပျော်ရွှင်မှုရဲ့ အဓိကအချက်ကတော့ ဒီလိုစိတ်ဖိစီးမှုတွေကို ဘယ်လိုဖြတ်ကျော်ရမလဲ ဆိုတာကို သိတတ်နားလည်ရပါမယ်။ အဲဒီအခါမှ ပျော်ရွှင်နေတဲ့ စိတ်က အရာအားလုံးကို အနိုင်ယူသွားနိုင်ပါတယ်။

ကြိုးစားကြည့်ကြပါ။ ကျင့်ကြံကြည့်ကြပါ။ ဘယ်အရာတွေကို စောင့်မျှော်နေမှာလဲ။ အခုချက်ချင်းပဲ ပြောင်းလဲလိုက်ကြပါတော့။ တွေးပါ...တွေးပါ.. ကြိုးစားပြီး အကောင်အထည်ဖော်ပါ။ နောက်ဆုံးအနေနဲ့ ပြောချင်တာကတော့ ...
“ဘ၀ဆိုတာ ကိုယ်ဖြစ်စေချင်သလို မွေးဖွားလာခဲ့ခြင်းမဟုတ်ပါ။ ဒါပေမယ့် ဘ၀ကို ပျော်ရွှင်လာအောင်တော့ တတ်နိုင်သလောက် တတ်စွမ်းသလောက် ဖန်တီး ယူနိုင်ပါတယ်လို့”။ အားလုံးပဲ ပျော်ရွှင်သောဘ၀ကို ဖန်တီး အကောင်အထည် ဖော်နိုင်ကြပါစေ...။

သက္ကရာဇ်နှစ်တွေတောင် အရောင်ပြောင်း

ရာစုသစ်သွန်းလောင်းတော့မှာပါလား

အတိတ်ဆိုတာ အိပ်မက်

ပစ္စုပ္ပန်ဆိုတာ ရလဒ်

အနာဂတ်ဆိုတာ မျှော်လင့်ချက်မို့

စိတ်ညစ်ခဲ့တာတွေ ဖယ်လိုက်

သိပ်ချစ်ခဲ့တာတွေ မေ့လိုက်

နာကျင်ခဲ့တာတွေ အစားထိုးလိုက်

အစာမကြေခဲ့တာတွေ မျိုချလိုက်

နောင်လာမယ့် နှစ်တွေအတွက်
အားသစ်တွေနဲ့ သွန်းလောင်း

လျှောက်ရမယ့် ဘ၀ကျောင်းကို

ပျော်ရွှင်မှုသကာလောင်းလို့ 

တစ်တန်း တိုးလိုက်ကြပါစို့ ...။

~~~ @@@ ~~~

မကြာခင် အချိန်ဆို ရာစုနှစ်သစ်ကို ရောက်ကြတော့မယ် ... ကျွန်တော်တို့ ဘ၀တွေလည်း တစ်နှစ် ထပ်တိုးလာတော့မယ်... ဘ၀မှာ လူတိုင်းလူတိုင်း မပျော်ရွှင်မှုတွေနဲ့ တွေ့ဆုံကြုံကွဲ ၀မ်းနည်းစရာတွေ အထပ်ထပ်တွေ့ကြုံခဲ့ပြီးပြီ... ဘ၀ဆိုတာ တကယ်တော့ တိုတိုလေးပါ ... ရလာခဲတဲ့ လူ့ဘ၀မှာ ကိုယ့်ကိုကိုယ် မတ်တည်ရင်း စိတ်ရင်းစေတနာကောင်းလေးတွေနဲ့ ပျော်ရွှင်သောဘ၀လေးများကို ဖန်တီးနိုင်စေဖို့ ပို့စ်လေးကို ရေးလိုက်ရခြင်းဖြစ်ပါသည်... ကျွန်တော် စာကောင်းကောင်းမရေးတက်ပါ... ရေးချင်လွန်း အားကြီးလို့သာ ရေးလိုက်တာပါ ... ကျွန်တော်ကိုယ်တိုင်ကိုက စိတ်မပျော်ရွှင်မှုတွေကို ဖြေဖျောက်ရင်း နှစ်သစ်မှာ စိတ်သစ်နဲ့ လူသစ်နဲ့ ရှင်သန်ဖို့ အတန်တန်ကြိုးစားနေရင်း ပျော်ရွှင်သောဘ၀ရဲ့ အနှစ်သာရကို ရှာဖွေမိခဲ့တယ်လေ... ညီအစ်ကို မောင်နှမ အားလုံးကိုလည်း ပျော်ရွှင်သောဘ၀ကို ဖန်တီးယူစေချင်ပါတယ်... နှစ်သစ်မှာ အားလုံးပျော်ရွှင်ကြ၍ ကိုယ်ရည်ရွယ်ထားသော အကြံအစည်များ ရှင်သန်ထမြောက်ပါစေလို့ နှစ်သစ်မင်္ဂလာ ဆုမွန်ကောင်း တောင်းလိုက်ပါသည်။

အင်တာနက်မှ ကိုးကားထားကြောင်း ၀န်ခံပါသည်။ ပုံကို ဒီ ကနေယူပါ၏။

*ဒဏ်ရာ ၀တ်စုံ*

မတွယ်ခဲ့ပါဘူး

နွယ်ခဲ့ရတဲ့ အိပ်မက်တွေ

ငါ့ ရင်မှာ အရုပ်တွေဆွဲ

ဇာတ်လမ်းတွေ ခပ်ကျဲကျဲမှာ

အရည်မရ အဖတ်မရနဲ့

ဝတ်ခဲ့ရတဲ့ ဒဏ်ရာဝတ်စုံ ...။

မထင်ခဲ့ပါဘူး

ပင့်ကူငယ် တွယ်ယက်သလို

နှလုံးအိမ်ကို အသုံးပြု

ငါ့ အသွေးအသားကိုစုလို့

မရည်ရွယ်ပါပဲနဲ့

ချုပ်ခဲ့ရတဲ့ ဒဏ်ရာဝတ်စုံ ...။

ပြည့်စုံကာနီးမှ

အလှည့်ကြုံလာပြန်တော့

တဖန်ပြန်စုတ်တဲ့ ၀တ်စုံ

စိတ်မကုန်လို့ ပြန်ချုပ်

အလုပ်မဟုတ်တာတွေက

အရှုပ်အရှုပ်လို ဟန်လုပ်တော့

ဘ၀တွေ တကယ်ပြုတ်ကျလည်း

ဝတ်နေရဦးမယ့် ဒဏ်ရာဝတ်စုံ ...။

အသစ်တဖန် ဖြစ်စေဦးတော့

မနက်ဖြန်တိုင်းမှာက အစစ်အမှန်ဆိုတာ

အပြစ်တင် ဝေမဖန်ချင်တော့ပါ ...။

ဒဏ်ရာဝတ်စုံဆိုလည်း

အလွမ်းကိုအန်ထုတ်

လေရှုထုတ်နေသရွေ့

ငါ့ အတတ်ငါစူး ရင်ထဲမှာ ရူးနေဦးမယ် ...။

( Brand မရှိတဲ့ ဒဏ်ရာဝတ်စုံလေး လိုချင်ရင် မှာကြားနိုင်ပါတယ်.. Free shipping နဲ့ ဘယ်နိုင်ငံမဆို အရောက်ပို့ပေးပါမယ်း) )

ခံစားမှု (၁)

ဘယ်တော့မှ မေ့မရခြင်းတွေနဲ့ ရင်ဆိုင်နေရပါတယ်။ ကြိုးစားပြီး မေ့ပျောက်ပေမယ့် မမေ့နိုင်တာ ဘယ်လိုလုပ်ရမှာလဲ ။ ဘ၀မှာ အချစ်ဟာဒီလောက်တောင်ပဲ ကံဆိုးခဲ့ရလားကွာ။ အိပ်မရတဲ့ညတွေ များလှပါပြီ။ ဘယ်လိုလုပ်မှ မေ့ပျောက်နိုင်မှာလဲ။ အချိန်တွေကြာလေ ခံစားရခြင်းတွေ ပိုများလာတယ်။ ဟုတ်မှာပါလေ... ငါဘယ်လိုမှ မတတ်နိုင်တော့လို့သာ မေ့ဖို့ကြိုးစားနေရတာပဲ။ ငါမျှော်လင့်ခဲ့ရတဲ့ အချစ်ကို နဲနဲလေးတောင် ပြန်မရခဲ့ပါလား။

တကယ်တော့ငါဟာအရူးပါ။ အချိန်တိုင်းမှာ သတိရနေခဲ့မိတယ်။ တမ်းတနေခဲ့မိတယ်။ ငါခံစားနေရတယ် ဆိုတာ ဘယ်သူကကော နားလည်နိုင်မှာလဲ။ ဒါပေမယ့် ရင်ထဲမှာ အရမ်းကို ဆို့နင့်ကြေကွဲနေမိပါတယ်။ သန်းခေါင်ကျော်တိုင် ငုတ်တုတ်ထိုင်ပြီး နင့်အကြောင်းကို တွေးနေမိတယ်လေ။ တကယ်ဆို ငါဟာ ဘာမှမရခဲ့ပါလား။ ငါဟာ အချစ်ကြီးလို့လား။ ဖြစ်နိုင်ပါတယ်... တချို့အရာတွေဟာ ရင်ထဲမှာ သိုဝှက်ထားရတာ မောလွန်းလှပါတယ်။ ပင်ပန်းလွန်းလှပါတယ်။ ဖွင့်ဟလိုက်ရရင် ပြေလျှော့သွားနိုင်ပေမယ့် ငါဘယ်သူ့ကို ဖွင့်ပြောရမလဲ။ ငါ့ကို အရူးလို့ပဲ ထင်နေကြမှာပေါ့။ ဟုတ်ပါတယ် ငါဟာ အချစ်နဲ့ပတ်သတ်လာရင် ရူးခဲ့ရပြီးပြီ.... ရူးနေရပြီးပြီ... ရူးနေရအုန်းမှာပါ။ ငါဟာအချစ်ကို တန်ဖိုးကြီးစွာနဲ့ ကိုးကွယ်ခဲ့မိတာကို။ ငါ့ရင်ထဲမှာ ဘာတွေတွေးခဲ့တယ် ဘာတွေရည်ရွယ်ခဲ့တယ်ဆိုတာ ဘယ်သူသိနိုင်မှာလဲ။ နင်တောင်မသိခဲ့ဖူးလေ။ ငါရဲ့ စစ်မှန်တဲ့အချစ်ကို အစော်ကားခံခဲ့ရတယ်။ ဒါပေမယ့် ငါနင့်ကို ဘယ်သောအခါမှ အပြစ်မတင်ခဲ့ပါဘူး။ အပြစ်လည်းမတင်ချင်ခဲ့ဘုးဆိုတာ ယုံကြည်ပေးပါ။

ဒီဘ၀မှာ မပြည့်စုံခဲ့ရတဲ့ ဆုတောင်းတွေအတွက် နောင်ဘ၀သာရှိခဲ့ရင် ပြည့်စုံပါရစေလို့ ရူးပါရစေ။ ပျော်ရွှင်မှုတွေ ပျောက်ဆုံးခဲ့ရတယ်။ ပိုင်ဆိုင်မှုတွေ ဆုံးရှုံးခဲ့ရတယ်။ အပြစ်တွေကို ခံယူခဲ့ရတယ်။ ယနေ့တိုင် ချစ်နေဆဲပါဆို ယုံကြည်ပေးပါ။ သတိရတိုင်းလည်း လွမ်းချင်ပါတယ်။ မျက်ရည် မကျမိအောင်လည်း ထိန်းချင်ပါတယ်။ ၀မ်းနည်းပူဆွေးမှုတွေလည်း ပျောက်ဆုံးချင်ပါတယ်။ ဒါပေမယ့်  ထာဝရသာတော့ ချစ်နေမိမှာပါ။

လူတယောက်မှာ အမှားမရှိပဲ လူတယောက်က ဘာကြောင့် စွန့်ခွာသွားနိုင်မလဲ။ စွန့်ခွာသွားတဲ့သူမှာ ဘာမှမကျန်ပေမယ့် ကျန်နေခဲ့တဲ့သူမှာ ဘာကြောင့်သတိရခြင်းတွေ ထင်ကျန်နေရတာလဲ။ လောကကြီးက မတရားလိုက်တာနော်။ ဖြစ်ချင်တာကို မဖြစ်ရ။ မျှော်လင့်ချင်တာကို မျှော်လင့်နိုင်အောင် အသက်မသွင်းပေးပါလား။ ဘာမှမရခဲ့တဲ့ငါ နောင်လည်း ဘာမှထပ်ရမှာ မဟုတ်တော့ပါဘူးလေ။

နောက်ဆုံးတော့လည်း နင့်အတွက် နာကျင်ခြင်းကဗျာတွေကို ရင်ထဲက မျက်ရည်တွေနဲ့ နာကျင်နေတဲ့ နှလုံးသားကို စတေးပြီး တသက်လုံးငါ့ရဲ့ နင်မဖတ်တဲ့ ဒိုင်ယာရီမှာ ငါ့မျက်ရည်တွေ မခန်းခြောက်သရွေ့ ဖျော်ဖြေ တင်ဆက်နေပါမယ်။ မရခဲ့တဲ့ နှလုံးသားတစ်စုံကို ထာဝရ သိမ်းပိုက်ထားရင်းနဲ့ပေါ့။

နင့်ဟာ

ငါ့ရဲ့ကောင်းကင်
ငါ့ရဲ့ ဘ၀မို့
ငါ့ကို ချေနင်း
ရက်စက်ခြင်းတွေ
ပေးထားခဲ့လည်း
တသက်မှာ တခါ
ထာဝရသာ
ရင်ခွင်ဦးမို့
ငါဟာသေမင်း
ရင်ဆိုင်ရင်းတောင်
မင်းကိုတမ်းတ

သတိရနေမယ်လေ...။

~~~ @@@ ~~~

(ဒီပို့စ်လေးဟာ ဇာတ်လမ်း မဟုတ်ပါဘူး။ ခံစားမှု စိတ်ထွက်ပေါက် ရှာလိုက်ခြင်း သက်သက်ပါ။ အဲ့ဒီအတွက် သီးခံပြီးဖတ်ပေးကြပါလို့ တောင်းပန်ပါရစေခင်ဗျာ။ ကဗျာလေးကတော့ ဟိုးအရင်ကတင်ခဲ့တာပါ။ ဖတ်သူမရှိခဲ့ပေမယ့် အခုခံစားမှုနဲ့ တိုက်ဆိုင်နေလို့ ပြန်ထည့်လိုက်ရခြင်းပါ။ အမြဲတမ်း ၀မ်းနည်း ကြေကွဲစရာတွေကိုပဲ ရေးလေ့ရှိတဲ့ ကျွန်တော့်ဒိုင်ယာရီကို လာလာဖတ်ပေးကြတဲ့ အတွက် ကျေးဇူးအထူးတင်ရှိပါတယ်။ ကဗျာတွေက လွဲရင်(ကဗျာလည်းမရေးတတ်သေးပါ) ကျန်တဲ့ စာတွေကို ကောင်းကောင်း မရေးတတ်လို့ ခွင့်လွှတ်ပေးကြပါလို့ ... )

ကောင်းကင်ရဲ့ အလွမ်း

လသာသော ညတစ်ညကပေါ့
ကောင်းကင် အလင်းအောက်မှာ
မြောက်ပြန်လေညှင်းကို ဆော့မြူ
အလွမ်းတွေ အရယူဖို့
ကြယ်လေးတွေကို တိုးတိုးလေး ရင်ဖွင့်မိတယ် ...။

လမင်းလေးရယ် ...
ကောင်းကင်ရင်ခွင်ဟာ
နူးညံ့လုံခြုံမှု အစွမ်းမှာ
ပထမတန်းပါပဲ ...
ငါ့ ရင်ခွင် ဖ၀ါးအောက်မှာ
လမ်းမပျောက်စေဖို့ဆို
ငါ့ရင်ကို အခါခါနင်း
ဗလာကျင်းလည်း
အလင်းနှစ် သန်းပေါင်းများစွာမှာ
အချစ်နဲ့ အလွမ်း ပေါင်းများစွာ ရှိနေဦးမှာပါ ...။

လမင်းလေးရယ် ...
ကောင်းကင်ရဲ့ သစ္စာနဲ့ ကတိဟာ
ဘယ်အရာနဲ့ထိထိ မငြိစေရပါဘူး ...
အလွမ်းအရှိအတိုင်း ပြောရတိုင်းဆို
နင်ရှိတဲ့ ညတွေ အခါခါသာစေဖို့
ကြယ်တွေကို ဆုတောင်းရတာလည်း
နေ့ ရက် ည သန်းပေါင်းများစွာမှာ
အချစ်နဲ့ အလွမ်းပေါင်းများစွာ ရှိနေချင်လို့ပါ ...။

အကြင်နာ တကယ်စစ်ရင်
ရင်မှာဒဏ်ရာ ဖြစ်တယ်ဆိုတာ တကယ်လားဟင် ...
အမှန်အမှား မခွဲခြားနိုင်ရင်တောင်
ရင်မှာ ခံစားရတာတွေ နင်သိပါစေတော့လေ ...။

ဘာပဲဖြစ်ဖြစ် ... လမင်းလေးရယ်
နင့် အလင်းဖြန့်ကျက်ဖို့ဆို
ငါ့ နှလုံးသားကွင်းပြင်မှာ
အလွမ်းငွေ့ငွေ့ လေးတွေနဲ့လည်း
ထာဝရ လန်းဆန်းနေမှာမို့
ကောင်းကင်တမိုးအောက်မှာ
လမ်း မ ပျောက် ပါ စေ နဲ့ သား ...။

“ အကြောင်းမကောင်းတဲ့ ဆောင်း”

ဆောင်းနှင်းမြူတွေ
လေဟာနယ်ကို ပက်ဖြန်း
ကမ္ဘာကိုလန်းစေသတဲ့လား
ငါ့... ရင်ခွင်နှုတ်ခမ်းမှာတော့
အလွမ်းတွေနဲ့ ချမ်းလိုက်တာ ...။

ဆောင်းနှင်းပန်းတွေ
ရာသီချိန်ဆို ပွင့်လန်း
ကိုယ်စီအစွမ်းတွေ ထုတ်ဖြန်းသတဲ့လား
ငါ့ ... ရင်ခွင်စခန်းမှာတော့
ဒက်ရာတွေနဲ့ ကြမ်းလိုက်တာ ...။

ဆောင်းခိုငှက်တွေ
ဌာနေဆီကို ပျံသန်း
ခိုလှုံရာလမ်းကို လှမ်းကြသတဲ့လား
ငါ့ ... ရင်ခွင်အခန်းမှာတော့
အိပ်မက်ရိုင်းတွေနဲ့ ဆန်းလိုက်တာ ...။

အားလုံးအတွက် ကောင်းတဲ့ဆောင်း
ငါ့ ... အတွက်တော့ မဟောင်းတဲ့ အကြောင်းပါလား ...
အေးချမ်းခြင်း အပေါင်းက ဒဏ်ရာကိုမွှေတယ်
ငါ့ ... နှလုံးသားကို နာကျင်စေတယ် ...
သြော် ... ဆောင်း ... ဆောင်း ... ဆောင်း
ဘ၀ပြောင်းတောင် အတိတ်ဟောင်းက
အိပ်မက်အကြောင်းကို အရောင်မပြောင်းနိုင်ပါလား ...။

“မာယာသခင်”

ပြောင်းလဲခြင်း မိုးတိမ်တွေက
ရွေ့လျားတာ မြန်လိုက်တာ
လေအတွေ့တွေကြောင့်
ရေငွေ့တောင် ဘယ်ဆီနေရမှန်းမသိဘူး
ဝှေ့ကာ ၀င်အခတ် လိုက်ပါချင်နေလျက်မို့လား
မသက်သာသလိုအမှတ်နဲ့ လိုက်ရဲလိုက်တာ ...။

ဆူးများပါတယ်ဆိုတဲ့ နှင်းဆီ
အတွင်းဆီက ဘာတွေကြိတ်ကြံနေမလဲ
နှုတ်ခမ်းပါးပါးလေးမှာတော့
အပြုံးလေးတွေချိတ် သစ္စာတွေမတိတ်ပေမယ့်
ရင်တွင်းအရိပ်မှာတော့ ခြေချင်းချိတ်နေကြတယ်
ပန်ဆင်သူအခူး အရူးအမူးနဲ့
အဆူးလေးတွေတောင် တိမ်းညွတ်မူးလိုက်တာ ...။

အလည်လာတဲ့ လေပြေ
သစ်အိုတစ်ပင်ကို ရစ်ထွေး အချစ်တွေပေးပြီး
နားခိုဖူးကျေးဇူး အထွေအထူးကို
တသသပြော ဖွင့်ဟစောပေမယ့်
ကြာလာတော့လည်း အဝေးတရပ်ဆီပြေး
အတွေးခက်ဘီအရေးနဲ့
အတွင်းသဘော စိတ်မနောကိုက
သာယာမှု အကြောမှာ မျောချင်နေလိုက်တာ ...။

လှမ်းမယ်ကြံရှိသေး ပြေးသွားလိုက်တာ
နမ်းမယ်ကြံရှိသေး ရူးခါးလိုက်ပါဘိ
မတည်မြဲတဲ့ တိမ် နှင်းဆီအိမ်တွေက
လေပြေလိုဆော့မြူး တွန်ကျူးနေချင်ကြတော့
သစ်အိုပင်ခမျာလည်း စိတ်တိုချင်စရာပဲ ...
အခါတော်အပေးမှာ ကညာဖော်ရှောင်ပြေးလို့
နေညိုချိန်လေးဆို မျှော်မျှော်နေတတ်လိုက်တာက
ရော်ကာရင့်တော့မယ့် သူ့ဘ၀
သူ့ သင်္ခါရသာ လူမသိလေတော့
ပြုသမျှ နုလိုက်ရတော့မယ်
အပေါ်ယံစကားနဲ့ပဲပြော
အတွင်းစိတ်ရေရောတဲ့ “မာယာသခင်”ရယ် ...။

ချစ်တတ်တဲ့ငါ ... အချစ်ငတ်တဲ့ အခါ

နာကျင်နေတဲ့ ကောင်းကင်ရဲ့ရင်မှာ
အခါခါပြိုကျခဲ့ရတဲ့ စိတ်ဓာတ်တွေ
ဘယ်ချောင်မှာ သိုဝှက်ထားရမှာလဲ ...။

ပိုင်ဆိုင်ချင်တဲ့ မင်းရဲ့ ရင်ခုန်သံတွေတောင်
ဒီလိုလူသား မရထိုက်ခဲ့လို့လား
သူ့တပါးလက်ထဲ ဓားပြတိုက်ခံနေရတယ် ...။

လေထုထဲ ကြားခံအထပ်ထပ်ဖြတ်သန်းပြီးမှ
ရောက်သွားတဲ့ ချိုမြိန်တယ်ဆိုတဲ့ စကား
တည့်တည့်ဆိုင်ဆိုင် ပြောနေတဲ့ သူလောက်
လမ်းမပေါက်ဘူးဆိုတာ သိခဲ့သင့်တယ် ...။

ဂရုစိုက် ဖေးမချင်တယ် ဆိုရင်တောင်
ကမ္ဘာတွေ အထပ်ထပ်က လေဟာနယ်ဒြပ်တွေကြောင့်
နီးနေသူ လူတွေလောက်တော့ ချောင်းမပေါက်ခဲ့တာ အသေအချာပဲ ...။

မျှော်လင့်ရင်းချစ်ရတယ်ဆိုတာ
တကယ်တော့
ရှုံးမှန်းသိရက်နဲ့ ကိုယ့်ကိုကိုယ် သတ်နေတာ ...။
နစ်မှန်းသိရက်နဲ့ ကိုယ့်ကိုကိုယ် ဖျက်နေတာ ...။

ညစဉ်ညတိုင်း အရိုင်းအစိုင်းဆန်စွာ ငိုရှိုက်နေလည်း
အချိန်ကတ္တားက ဘ၀တခြားသို့
နာကျင်စွာကျောခိုင်းဖို့ပဲ ဖြစ်လာလိမ့်မယ် ...။

ဝေဒနာတွေ ရင်မြွှာအခြေမှာ ကပ်ဆိုက်လည်း
ငတ်မွတ်ခေါင်းပါးခဲ့တဲ့ ငါ့အချစ်က
ငါ့အပြစ်ကိုပဲ ကြိုးဆွဲချရတော့မလိုလို ...။

တခါသာ ချစ်ခဲ့ဖူးလည်း
ထာဝရ တည်စေမယ်ဆိုတာ
ငါကြွေတဲ့ တစ်နေ့မှ မင်းသိနိုင်ပါစေ ...။

မှန်မှန်းသိရက်နဲ့ ငါကြောက်ခဲ့၏ ...။
မှားမှန်းသိရက်နဲ့ ငါလျှောက်ခဲ့၏ ...။
မရမှန်းသိရက်နဲ့ ငါချစ်ခဲ့၏ ...။
မနိုင်မှန်းသိရက်နဲ့ ငါစတေးခဲ့၏ ...။

တကယ်တော့လည်း
တောင်စွယ်နေကွယ်ရင်ဖြင့်
အနောက်ဘက်ယွန်းယွန်းမှာ
“အချစ်” ဆိုတဲ့ စကားနှစ်လုံးကို
ရာဇသံပေးလို့  သဂြိုလ်သွင်းရင်တောင်
“ချစ်တတ်တဲ့ငါ ... အချစ်ငတ်တဲ့ အခါ”
ဘ၀တခြားမှာ သဘာဝတရားလို
သေစားသေစေ ခံစားစေမယ် ...။
~~~~~~~~~~~~
(နာကျင်မှုကြောင့် ကျတဲ့ မျက်ရည်တွေတိုင်း ရောက်လေရာဘ၀မှာ အချစ် ဖြစ်ပါစေ။)

ရှိနေကြမယ်

ပြိုင်ဘက်ကင်း အလင်းနဲ့
ချစ်ခြင်းတွေ ရောယှက်
အပြုံးတခက် ဆက်တဲ့ရက်
နှုတ်ခွန်းချို တစ်မနက်မှာ
စကားတွေဆို လိုသလိုညှိဖို့
ပျားသကာလိုချို နှစ်ကိုယ်သာ အသိမို့
လူတကာမသိလေတောင်
ရင်မှာရှိနေကြမယ်
ထာဝရ  မပျက်သုန်းပဲ
သီကုံးကြမယ့် အချစ်ပုလဲလုံးတွေနဲ့ ...။

ဘာရယ်မဟုတ်ပါဘူး ရင်ထဲမှာ ရှိတာလေးကို ပြောချင်တာပါ။

သုံးရာသီ တမ်းချင်း

“မိုး” တွေစွေတိုင်း

မျက်ဝန်းစိုစို

ပုလဲခိုလို့

အလွမ်းမပို ရပါစေနဲ့  မေ ...

“ဆောင်း” နှင်းဝေတိုင်း

ရင်ထဲမှာညို

အမုန်းပိုကို

မထွေးပိုက် ရပါစေနဲ့  မေ ...

“နွေ” နေပူတိုင်း

နှလုံးအိမ်ကို

ရူးသွပ်စေဖို့

မခံစား ရပါစေနဲ့  မေ...

“နွေ” နဲ့ “မိုး” “ဆောင်း”

ဘယ်လိုပြောင်းလဲ

ပျော်ရွှင်မှုတွေ

အစဉ်ထာဝရ

ခံစားစေဖို့

ဆောင်ကျဉ်းပေးလေ ... ချစ်သူရေ ...  ။

လွန်ခဲ့သော တစ်နှစ်ခန့်က ရေးခဲ့တဲ့ ကဗျာ လေးပါ...။

ည (သို့) မိုး (သို့) မျက်ရည် (သို့) လွမ်းဆွတ်ခြင်းနဲ့ အတူ

“ဟဲလို...နိုး...နေကောင်းလားဟင် ကို လွမ်းပြီးစိုးရိမ်နေတာ” “အင်း ... ကောင်းတယ် ကို ရောနေကောင်းလားဟင်” “ကောင်းတယ်... နိုး” “ဘာတွေလုပ်နေလဲဟင်” “ကို့ ဖုန်းကိုစောင့်နေတာလေ” “ဟုတ်လား... ဟဲလို...ဟဲလို ကြားရလား နိုး” “သိပ်မကြားရဘူး...အင်း ခုကြားရပြီ... ပြောလေ ကို” “နိုး ကိုသိပ်ချစ်တယ်...ကြားလား” “မကြားရတော့ဘူး တကယ်ပြောတာ .. ဟင်း...ဟင်း” “အာ .. နိုး ကနောက်နေတယ်... ကို ကတကယ်လို့ထင်နေတာ” “စတာပါ ကို ရဲ့ ချစ်လို့ သိလား” “အင်း သိတာပေါ့... နိုး  ကျန်းမာရေးကို ဂရုစိုက်ပြီးနေနော်” “ဟုတ်ကဲ့... ကို လည်း ဂရုစိုက်နော်.. ကို့ ကိုသိပ်ချစ်တယ်” ....

သူ မျက်လုံးတခုလုံး ရုတ်တရတ် ပူနွေးလာတယ်။ မငိုဘူး လုံးဝမငိုဘူးလို့ ဆုံးဖြတ်လိုက်ပေမယ့်  ပါးပြင်တခုလုံးပေါ်မှာ ပူနွေးနေတဲ့ မျက်ရည်တွေက ရွှဲစိုလို့နေပြီပဲလေ။ မငိုချင်ပါဘူး... တကယ်ဆို ငိုတာ နိုး လုံးဝမကြိုက်ဘူးလေ။ အားတင်းလိုက်တဲ့ ရှိုက်သံတခုက တိတ်ဆိတ်နေတဲ့ ည၀န်းကျင်မှာ ထွက်ပေါ်လို့လာတယ်။ သူ...ဖုန်းထဲက အသံသွင်းထားတဲ့ ဖိုင်လေးကို ပိတ်လိုက်တယ်။ ဒါသူ့အကျင့်လေ နိုး နဲ့ ဖုန်းပြောဖြစ်တိုင်း အသံသွင်းထားတတ်သလို online မှာလိုင်းကောင်းလို့ စကားပြောဖြစ်တိုင်း အသံဖမ်းထားတတ်တယ်။ ဒါတွေက အရင်ကတော့ ပြန်နားထောင်တိုင်း ကြည်နူးစရာလေးတွေပေါ့လေ။ ခုတော့... သူ့အတွက် မျက်ရည်မြစ်ဖျားခံရာ အရင်းအမြစ်တခု ဖြစ်လို့နေတယ်ဆိုတာ သူသိနေရက်နဲ့ သူကျေနပ်နေမိပါလား။ ဟင်းးးး... သက်ပြင်းရှည်တခုကို ဖြည်းဖြည်းချင်း မှုတ်ထုတ်မိလိုက်တယ်။ သူ ဒီညကို ဘယ်လိုလုပ်ရရင် အိပ်ပျော်မလဲလို့ စဉ်းစားလိုက်တယ်။ ဘာရယ်မဟုတ်ပဲနဲ့ လက်တဖက်က ခေါင်းအုန်းအောက်ထဲ ရောက်သွားတယ်။ စာအိတ်လေးတအိတ်ကို စမ်းမိလိုက်တော့ လက်တွေတခုလုံး ကျင်ပြီး ထုံတက်သွားတယ်။ သူ အတင်း မေ့ထားခဲ့သည့် အရာ... ဖြည်းဖြည်းချင်း ဆွဲထုတ်လိုက်မိတယ်လေ။ သူအရမ်းမြတ်နိုးတဲ့ နိုး ရဲ့ဓာတ်ပုံလေးတွေ။ အယ်လ်ဘမ်နဲ့ထားရင် ခေါင်းအုံးအောက်မှာ ထားလို့မရမှာစိုးလို့ စာအိတ်လေးနဲ့ပဲ ထည့်ထားခဲ့မိတာ။ သိပ်တော့မရှိပါဘူး.. (၈)ပုံ မှအတိအကျပါပဲ။ နိုးက ဓာတ်ပုံသိပ်မရိုက်ဘူးလေ.. ဒါတောင် အတင်းရိုက်ခိုင်းလို့ ရိုက်ပြီးပို့ပေးထားတာ။ ညအိပ်ယာဝင်တိုင်း တပုံချင်း ထုတ်ကြည့်ပြီး စကားတွေပြောပြီးမှ အိပ်တတ်တဲ့ အကျင့်.. အတင်းဖျက်ထားခဲ့မိတာ။ ဘယ်လောက်ထိ တင်းခံနိုင်မှာလဲ နိုး ရယ်။ စချစ်ကတည်းက အချစ်စစ်တွေနဲ့ ပုံပြီးချစ်ခဲ့ရတာလေ။ အရင်လိုပဲ လွမ်းနေပါရစေ နိုး ရယ်... အရင်လိုပဲ တမ်းတနေပါရစေ... ဓာတ်ပုံထဲက ချစ်စရာ ကောင်းလောက်အောင် ပြုံးပြနေတဲ့ နိုး ပါးလေးကို သူတယုတယ ကိုင်လိုက်တယ်။ “တောက်... ကျပြန်ပြီ ဒီမျက်ရည်...” သူ့ကိုယ့်သူ အလိုမကျမှုတွေနဲ့ ရေရွတ်ရင်း အမြန်သိမ်းပြီး ခေါင်းအုန်းအောက်ထဲ ပြန်ထည့်လိုက်တယ်။ မှားပြီ သူသိလိုက်တယ် ... စမ်းမိလိုက်တဲ့ နောက်ထပ်အရာတခုက MP3 လေး သူအသံသွင်းသမျှဖိုင်တွေကို ထည့်ထားတာ။ အားမသွင်းဖြစ်ခဲ့တာ ကြာခဲ့ပြီလေ။ အားရှိဦးမလားလို့ ဖွင့်ကြည့်လိုက်တယ်။ Low Battery တဲ့ ... အင်း ဒါသူ့အတွက် ပိုကောင်းသွားခဲ့တာပေါ့။

တော်ပါပြီ အိပ်ပျော်အောင်ပဲ အိပ်လိုက်တော့မယ်လို့ ဆုံးဖြတ်ပြီး အိပ်ယာပေါ်ကို လှဲချလိုက်ပြီး မျက်လုံးကို မှိတ်လိုက်တယ်။ သြော်.. ညကလည်း တိတ်ဆိတ် လွန်းလှချည်လား။ အမှောင်ထဲမှာ နိုး ပုံရိပ်က ထပ်ပေါ်လာပြန်တယ်။ သူုစိတ်တိုသွားတယ်.. မတတ်နိုင်ဘူး ဒီည လုံးဝအိပ်လို့ ရမှာလည်း မဟုတ်တော့ပါဘူး။ သူဖြည်းဖြည်းချင်းထပြီး အိပ်ယာဘေးက ကွန်ပြူတာကို ဖွင့်လိုက်တယ်။ ညဉ့်ငှက်တကောင်က သူ့ကိုလှောင်ပြီး တချက်အော်လိုက်သေးတယ်။ “ငှက်စုတ်ငှက်နာ ကိုယ့်ဖာသာ လွတ်ရာကျွတ်ရာ သွားနေစမ်းပါကွာ” အသံထွက်ပြီး သူပြန်အော်လိုက်တယ်။ ကွန်ပြူတာကို ပြန်ကြည့်ပြီး Gmail ကို အရင် ဖွင့်လိုက်ပြီး Sent Mail ထဲမှာ နောက်ဆုံးပို့ထားတဲ့ မေးက “နိုး အတွက် (၂၀၉)တဲ့” ... မေးပို့တိုင်း အမှတ်စဉ်၊ နေ့ရက်၊ အချိ်န်တွေကို အတိအကျထည့်ပြီး ပို့တက်တဲ့ သူ့အကျင့် (နိုး တယောက်တည်းကို အဲလိုပို့ခဲ့တာပါ) ခုထိဖျောက်ဖျက်လို့မရနိုင်ဘူး။ ဒါတောင် အဖြေမရခင်က ပို့ခဲ့တဲ့ မေးတွေမပါသေး။ သြော် .. နိုး ရယ် ဘယ်လောက်ပဲ အလုပ်ရှုပ်ရှုပ် အချိန်မရှိလည်း မေးတွေကို တော့ နိုး ဆီကို တတ်နိုင်သလောက် ရောက်အောင်ပို့ခဲ့တယ်နော်။ မေးပို့တိုင်း ကဗျာတွေပါ ထည့်ပို့တတ်တယ်၊ ကို ကဗျာတွေ မရေးဖြစ်တာတောင် ကြာနေပြီလေ။ ဘာလုပ်ရမှန်းမသိဖြစ်နေတုန်း ကော်ဖီသောက်ရရင် ကောင်းမလား သူ တွေးလိုက်တယ်။ အတွေးမဆုံးနိုင်သေး သူထရပ်လိုက်တယ်... အခန်းအပြင်ကို ထွက်ပြီး ကော်ဖီပူပူလေးကို နှပ်ပြီး ယူလာလိုက်တယ်။ သူနဲ့ နိုး က အကျင့်တူတယ်လေ။ ကော်ဖီခါးခါးကိုမှ သောက်တတ်တာလေ။ ကော်ဖီမှုန့် စစ်စစ်ကို နှပ်ပြီး သောက်ရတာ အရမ်းကြိုက်တယ်။ ခုဒီမှာတော့ ကော်ဖီမှုန့် Ready Made ကိုပဲ နှပ်ပြီးသောက်ရတာပေါ့။ ဒီအချိန် နိုး ကော ကော်ဖီဖျော်သောက်နေမလား၊ တချက်ပြုံးလိုက်မိတယ် သူမဖြစ်နိုင်တာကို တွေးနေတာပဲ။ ဟုတ်တယ် မဖြစ်နိုင်တော့ပါဘူး။ ဖျက်ခနဲ လက်လိုက်တဲ့ လျှပ်စီးတချက် တခန်းလုံးလင်းသွားတယ်။ အခုမှ သတိထားလိုက်မိတာက ပတ်ဝန်းကျင်အပြင်ဘက်ကို။ မိုးသားတွေက ဗျူဟာတွေ ခင်းနေကြပြီ။ သူတို့ ထိုးစစ်စင်တော့မယ်လား။ ပြတင်းတံခါးကို ဆွဲဖွင့်လိုက်မိတယ်။ လေခပ်ရိုင်းရိုင်းတချက်က ၀ုန်းခနဲနေအောင် ရင်ဘတ်ကို ဆောင့်တိုးသွားတယ်။ ကိစ္စမရှိ .. ဒီလေလောက်တော့ ရင်ထဲက ခံစားနေရတွေက အေးဆေးပေါ့။  ကွန်ပြူရှေ့ကို ပြန်ထိုင်လုိက်ပြီး ဘာလုပ်ရမလဲ ကြည့်လိုက်တယ်။ ရီချင်သလိုဖြစ်သွားတယ်။ Gmail ရဲ့ Label မှာ ချက်ခဲ့သမျှကို NOE ဆိုပြီး Label လေးလုပ်ထားခဲ့တာကိုး။ နေရာတိုင်းမှာ အမှတ်ရစရာ ခြေရာလေးတွေ ထင်ကျန်ဖြစ်အောင် သူဘာလို့များလုပ်ခဲ့မိတာလဲ။ မထူးတော့ပါဘူး... ပြန်ဖတ်လိုက်တယ် အဟောင်းဆုံးသော အစကနေ။ ဖတ်နေရင်းနဲ့ ရင်ထဲမှာ ကြည်နူးလာတယ်၊ ပျော်ရွှင်လာတယ် .. နိုး သူ့ကို တော်တော်ချစ်ခဲ့တာပဲ။ မျက်လုံးထဲမှာလည်း အတိတ်ကို  ဖြည်းဖြည်းချင်း ပြန်ပုံဖော်နေမိတယ်။ အချိန်တွေ ကုန်မှန်းမသိ ကုန်လာတာ သူ သတိမထားမိတော့ဘူး၊ မျက်လုံးတွေတနေရာမှာ ရပ်သွားတယ်။ ပျော်ရွှင်မှုတွေက ၀ုန်းကနဲဆို ကြက်ပျောက်ငှက်ပျောက် ပျောက်သွားတယ်။ အဲဒီနေ့...အဲဒီနေ့ ... နိုး ကရှေ့မဆက်နိုင်ဘူးလို့ ပြောခဲ့တဲ့နေ့ ... သူအမျိုးမျိုး တောင်းပန်ခဲ့တဲ့နေ့။ ရင်ထဲက ၀မ်းနည်းမှု အကြွင်းအကျန်တွေက ပြန်ဖောက်လာတယ်။ ရင်ဘတ်ထဲက ဆောင့်တက်လာတဲ့ ခံစားမှု။ သူ့ရင်ဘတ်ကို လက်နဲ့ သက်သာရာ သက်သာကြောင်း တဘုံးဘုံးပြန်ရိုက်လိုက်တယ်။ ပြတင်းပေါက်မှာ သူ့ကို ခိုးပြီးစောင့်ကြည့်နေတဲ့ ညဉ့်ငှက် က ကြောက်လန့်ပြီး ထပျံသွားတယ်။ သူချည့်နဲ့စွာနဲ့ အားတင်းပြီး ထရပ်လိုက်တယ်။ ပြတင်းပေါက်မှာ ရပ်ပြီး ကောင်းကင်ကို ကြည့်လိုက်မိတော့ မိုးသားတိမ်တွေက စစ်ချီလာပြီ။ လျှပ်စီးလက်သံတွေ၊ မိုးထစ်ချုံးသံတွေက အဆက်မပြတ် လေပြင်းတွေကို အကြိုလွှတ်ပြီး ငါတို့လာပြီဆိုတာကို အသိပေးခိုင်းလိုက်တယ်။ မိုးသားတွေ စစ်ချီလာတာ မစောင့်နိုင်တော့ဘူး။ သူ မျက်ရည်မိုးတွေကို အရင်သွန်းဖြိုးလိုက်တယ်။ ငိုမယ်..ငိုလိုက်စမ်းပါကွာ။ ဘယ်သူမှမရှိဘူး... ဘယ်သူမှလည်းမသိဘူး။ ရတယ် ငိုမယ်။ “နိုး ရယ် ကို့ဆီကို ပြန်လာခဲ့ပါကွာ” သူမိုးချိန်းသံနဲ့ အတူ အားကုန်ဟစ်အော်လိုက်တယ်။ မိုးကလည်း သူ့အော်သံအဆုံးမှာ တ၀ုန်းဝုန်းနဲ့ ရွာချပစ်လိုက်တယ်။ သြော်.. မိုးကို အရမ်းကြိုက်တဲ့ နိုး ... မိုးရွာထဲမှာ တစ်ယောက်လက်ကို တစ်ယောက်ဆွဲရင်း လမ်းလျှောက် ထွက်ချင်ပါတယ်ဆိုတဲ့  နိုး ၊ မိုးတွေအရမ်းသည်းလာတာ ချစ်သူတွေအရမ်းချစ်ကြလို့ လို့ပြောခဲ့တဲ့ နိုး ။ အခုကော နိုးရယ်။ သူ့မျက်နှာတွေ စိုရွှဲနေပြီ။ မျက်ရည်တွေကော မိုးရေတွေကော။ သူမိုးစက်မိုးပေါက်တွေကို တွန်းလှန်ရင်းနဲ့ ကောင်းကင်ကိုမော့ကြည့်လိုက်တယ်။ ရင်ထဲက ကဗျာတပုဒ်က ထွက်ကျလာတယ်။ သူတိုးတိုးလေး ရွတ်ဆိုလိုက်တယ်..............

မမြင်ဖူးလို့

မူးကို မြစ်ထင်ခဲ့တဲ့ ဖြစ်စဉ်

မချစ်ဖူးလို့

အချစ်ထူးခဲ့တဲ့ ရာသီတွေနဲ့

မကြင်ဖူးလို့ 

အရူးလို ဖြစ်စဉ်နဲ့ တာရှည်

ရင်စူးစေ

နိုးကို ချစ်နေဦးပါမည်  ။

PS.. နာကျင်ခြင်းနဲ့ လူတစ်ယောက် ကောင်းကင်တမိုးအောက် အလွမ်းတွေကောက်ရင်း လမ်းတွေပျောက် ...း(

“နံနက်ခင်း ရဲ့ ဆောင်းသင်းရနံ့”

ငါ ... နိုးထတဲ့ ဒီနံနက်ခင်းမှာ
ဝရန်တာနံဘေး ခြေစုံငေးရင်း
အကြည့်တွေကို ဆန့်ထုတ် လိုက်တဲ့အခါ
တိုက်ခတ်လာတဲ့ လေဖြူးဖြူးလေးက
ဆောင်းအငွေ့အသက်တွေ ခြုံလွှမ်းလို့
ငါ့ ... ရင်ကို ရနံ့လေးတွေနဲ့ ၀င်တိုက်သွားတယ် ...။


သင်းပျံ့တဲ့ ဆောင်းသင်းရနံ့ကို
နှလုံးသားဖွင့်လို့ ရှုရှိုက်မိတော့
ခံစားလိုက်ရတဲ့ စိတ်ကူးအဆုံးမှာ
နင့် ... ပုံရိပ်တွေက လေညှင်းလေးနဲ့ မခြား
ငါ့ ... ရင်ကို နွေးထွေးစေလိုက်တာ ...။


“နွေး” ရယ် ... လို့ ...
တိုးတိတ်စွာ ငြီးမိတော့
ရင်ထဲမှာ ကြည်နူးလိုက်ရတာ ...
တကယ်တော့ ...
ငါ ... အမြတ်နိုးဆုံး နှလုံးသားမှာ
ထင်ဟပ်နေတဲ့ ပုံရိပ်မို့လား
နွေးထွေးတဲ့ ဒီနံနက်က
ငါ့ ... အတွက်တော့
တန်ခိုးရှင် ဖန်ဆင်းတဲ့
ပြီးပြည့်စုံတဲ့ နိုး ထ ခြင်း ပေါ့ ...။


ပိုင်ဆိုင်ရယူလိုမှု မရှိ
တွေးနေရုံနဲ့ ကျေနပ်တတ်တဲ့ ... ငါ
မိုင်ထောင်ချီ ဝေးနေလည်း
အတွေးတွေ နီးနေတယ်ဆိုတာ
ဆောင်းရနံ့တွေ သင်းတဲ့
လေညှင်းလေးတွေ သိပါတယ် ...။


ဒီလိုနဲ့ ...
အမြဲတမ်း လင်းတဲ့ နံနက်ခင်း
အမြဲတမ်း သင်းတဲ့ ဆောင်းလေးညှင်းနဲ့ အတူ
ငါ့ ... ရဲ့ ... အပြင်ဘ၀ထဲက
ရင်ခွင်ထံပါးသို့ တံခါးခေါက်လို့
အပြီးရောက်လာခဲ့ပါလား ...
နှလုံးသား အပိုင်စားပေးဖို့ဆို
ဆောင်းလေသင်းနံ့ ရနံ့မရှိလည်း
“နွေး” ဆိုတဲ့ တိုးရှိုက်သံက
ငါ့ ... နံနက်ခင်းတိုင်းကို လင်းလက်စေမှာ ...။
             ~~~~~~ 

မနေ့ညကပေါ့ ကျွန်တော်သူငယ်ချင်းတစ်ယောက်က အက်စ်ဆေးလေးတခုကို သူ့ကောင်မလေးအတွက် ခံစားပြီးရေးထားတယ်တဲ့။ အဲဒါလေးကို “ကဗျာ” လေးတစ်ပုဒ်နဲ့ သီကုံးပေးပါလားဆိုလို့ သူ့အတွက် ရေးပေးပြီးတော့မှ ကြိုက်လွန်းလို့ ပြန်လည်ဝေမျှလိုက်ပါတယ်။

လမ်းဟောင်းလေး

နှင်းမြူဖြူဖြူ ချမ်းမြမြမှာ

အလင်းအထူတွေ ပိုက်ထွေး

နှစ်ယောက်အတူ ရေးခဲ့ကြတဲ့

လမ်းဟောင်းကလေး နံဘေး

ပန်းတောလေးကလည်း

ရနံ့မပျယ်သေးပါလား ...။

သစ္စာပန်းအပြုံးတွေမှာ

ကတိနှောင်ကြိုးတွေ ရစ်ထွေး

နှစ်ယောက်အတူ သီကြွေးခဲ့ကြတဲ့

လမ်းဟောင်းလေး နံဘေး

ခုံတန်းလေးလည်း

နဂိုအတိုင်း မပြောင်းလဲသေးပါလား ... ။

ပျော်ရွှင်မှုအတိတ်တွေမှာ

သံသာလေးတွေနဲ့ နှောင်ထွေး

နှစ်ယောက်အတူ တွေးခဲ့ကြတဲ့

လမ်းဟောင်းလေး ပေါ်ပြေး

ခြေလှမ်းကလေးတွေလည်း

အရိပ်လို ထင်နေဆဲပါလား ... ။

နှုတ်ဆက်ရမယ့် ညနေတွေမှာ

စိတ်မချခြင်းတွေနဲ့ ရှိုက်ထွေး

နှစ်ယောက်အတူ အနမ်းပေးခဲ့ကြတဲ့

လမ်းဟောင်းလေး နံဘေး

သစ်ရိပ်လေးတွေကလည်း

ရှက်တက်နေတုန်းပါပဲလား ... ။

သက္ကရာဇ်တွေနှောင်း

သက်ရှိတွေ အရောင်ပြောင်းလည်း

မပြောင်းလဲတဲ့ လမ်းဟောင်းလေးရေ ...

နှင်းတွေကြွေပြီး ပန်းတွေဝေ

မြေသင်းရနံ့တွေ ထုံသင်း

ကျေးငှက်တွေ ခုန်ခုန်ဆင်းကြတဲ့

လမ်းဟောင်းလေးရဲ့ ၀န်းကျင်မှာပဲ

မှုန်ဝေနေတဲ့ မျက်လုံးတစုံ

တုန်ရီနေတဲ့ လက်အစုံနဲ့

အငိုရှိုက်သံတွေ အဆုံးမှာ

ကဗျာ တစ်ပုဒ်ကို

ဒဏ်ရာတွေ ချုပ်ဖို့

အစာသွတ်ခွင့်ပြုပါတော့လေ ...။

မျှော်လင့်ရင်းရူး

မျှော်လင့်ချက် ကမ်းနဖူးမှာ

အလွမ်း ရဲ့ခတ်သံကို

စောင့်ရင်းရူးနေရတဲ့...ငါ

လေပြေရိုင်းရဲ့ ပွတ်တိုက်သံက

မဆီမဆိုင်နဲ့ လူကိုယိုင်အောင်

လာလာ ခနဲ့တယ် ...။

လေပြေရယ် မနိုင်ချင်ပါနဲ့လား ...

မပြိုင်နိုင်တဲ့ ငါ့ နှလုံးသား

လုံးမပါးခင်တော့

ငါ... တူးဆွ တဲ့ အကြောင်း

အကောင်းချည်းသက်သက်မဟုတ်လည်း

ဒီလမ်း ဘယ်လောက်ဝေးပစေ

လျှောက်လှမ်းပါရစေနော် ...။

ငါ...ဟာ

အလွမ်း အော်သံအဆုံးမှာ

လမ်းတွေ မပျောက်ဆုံးချင်လို့ပါ ...။

နှလုံးသား ခေါ်သံအဆုံးမှာလည်း

အရှုံးများ ရင်မဆိုင်ချင်သေးလို့ပါ ...။

တွေးကြည့်လိုက်တဲ့ မသိစိတ်က ...

ဒီကမ်းရဲ့ လမ်းအဆုံးမှာ

ရှုငြီးဖွယ်ရနံ့နဲ့  ညက်ညောတဲ့

ပန်းခင်းတွေ ရှိရင်ရှိမယ် ...။

ရိုင်းစိုင်းမှု ရုပ်လုံးနဲ့ ညှို့မှိုင်းတဲ့

သစ်ရိုင်းတောတွေ ရှိချင်ရှိမယ် ...။

အတ္တတွေဖုံး စိတ်အမှောင်မှာ ရုန်းနေတဲ့

အချစ်ရဲ့ စေတမန် ရှိချင်ရှိမယ် ...။

နှလုံးသားဖြောင့်ချက်ကို သက်သေလုပ်နိုင်တဲ့

သဘာဝတရားသူကြီး ရှိချင်ရှိမယ် ...။

မျှော်လင့်ချက် အလင်းရောင် ခေါ်ဆောင်ပေးတဲ့

မီးအိမ်တလက် ရှိချင်ရှိမယ် ...။

ဘယ်သူသိနိုင်မှာလဲလေ ...။

နတ်မဖွက်တတ်တဲ့ အချစ်ဆိုတာ

အရောင်ကင်းလှတာမို့

အလင်းမရှိတဲ့ နေ့ဆိုတာ

တရံတခါပဲ ရှိတတ်တာမို့

အဖြူရောင် အဆင်းရှိတဲ့ နှလုံးသားကို

ကြိုလင့်မယ့် ရောင်နီနဲ့ပဲ

ဒီကမ်းနဖူးမှာ
 မျှောင်လင့်ရင်းရူး နေတော့မယ် ...။

~~~~~~~~~~

ပုံကို ဒီ ကနေယူပါ၏။

ဒွိဟ ... မိုး

“ ဒွိဟ ... မိုး ”

မိုးမြူမှုန်တွေက

နှလုံးအိမ်ကို ပက်ကျဲ

အလွမ်းတွေရဲခဲ့လို့လား...

ေ၀၀ါးနေတဲ့ စိတ်အမှောင်တိုက်မှာ

ချောင်ပိတ်လို့ အရိုက်ခံလိုက်ရပြီ ...။

အပြင်မှာ ပြိုမလိုနဲ့

ရင်ထဲမှာရွာနေတဲ့ မိုးတွေ

မစွေပဲနဲ့ သည်းလိုက်ပါတော့လား..

ရင်ခွင်တ၀ိုက် နေရာလပ်မှာ

ဒဏ်ရာတွေ ထပ်မစိုက်ပါရစေနဲ့တော့ ...။

အငိုက်မိလိုက်တဲ့ အရှိုက်နဲ့

တိုက်မိလိုက်တဲ့ တိမ်တိုက်တွေ

မိုးရေတွေကို စုပ်ယူလိုက်ပါတော့လား ...

ထုံကျင်နေတဲ့ ပစ္စုပ္ပန်မှာ

အနာတရနဲ့ ရှတတမဖြစ်ချင်တော့လို့ပါ ...။

တကယ်တော့လည်း

စဲသွားတဲ့ မိုးရေနဲ့

ကြဲသွားမယ့်အလွမ်းတွေတောင်

ဒွိဟစိတ်နောက် တကောက်ကောက်လိုက်လို့

နောက် နေတဲ့ ရင်ခွင်မှာ

ကြောက်နေခဲ့ရတာလေ

ခမ်းခြောက်သွားမယ့် နှလုံးသားကိုပေါ့ ...။

ပုံလေးကို ဒီ ကနေယူပါ၏။

“နတ်သမီးအတွက် ကဗျာ”

ဒီကဗျာလေးကို အစ်မ အဖြူရောင်နတ်သမီး ရဲ့ နိုဝင်ဘာ (၁၉) ရက်နေ့ (ဒီနေ့)မှာ ကျရောက်တဲ့ မွေးနေ့လေးအတွက် ရေးစပ်ပေးထားတာပါ။
အစ်မ ရှင်သန်ရာ ဘ၀တလျှောက်လုံးမှာ ပျော်ရွှင်ခြင်း ကျန်းမာခြင်း တွေနဲ့ ကိုယ်ရည်မှန်းထားတဲ့အရာ
မျှော်လင့်ထားသော စိတ်ကူးတွေနဲ့ အတူ ရှေ့ဆက်နိုင်ပါစေ။
ထာဝရ ပျော်ရွှင်နိုင်တဲ့ ပူလောင်ခြင်းတွေကင်းတဲ့ နေ့ရက်မျိုးကို ပိုင်ဆိုင်နိုင်ပါစေ။
အစ်မချစ်တဲ့ ကဗျာတွေ အစ်မတန်ဖိုးထားတဲ့ စာပေတွေကို ဆထက်တပိုး ထမ်းရွက်နိုင်ပါစေဗျာ။
ကျွန်တော့်ရဲ့ မွေးနေ့လက်ဆောင်အဖြစ် ဒီကဗျာလေးကို လက်ခံပေးပါ။
မွေးနေ့ရှင်အစ်မအတွက် ကျွန်တော့်ဘလော့ဂ်မှာ ဤကဗျာလေးဖြင့် မွေးနေ့ဆုမွန်ကောင်း တောင်းလိုက်ပါတယ်။

~~~~~~~

“နတ်သမီးအတွက် ကဗျာ”

အကာအရံ များစွာနဲ့

ကန့်သတ်ပိုင်းခြားထားသော

ကမ္ဘာ့နံရံများကြားက

ဖောက်ထွက်လာတဲ့ အလင်းတန်း

ကမ္ဗလာမြေလွှာတွေ လန်းစေဖို့

နတ်ပျိုမင်းသမီးကို

ရက်တိုတို အလင်းနဲ့

ချက်ချင်း ဖန်ဆင်းလိုက်တယ် ... ။

ပျိုးပျိုးပျက်ပျက် လက်နေတဲ့

သူ့ ... မှော်ဝင်ကကွက်တွေမှာ

ရာဇ၀င် တင်စေဖို့

အချင်းနဲ့အလင်းကို ပေါင်းဖက်

တတ်စွမ်းသမျှ အတတ်နဲ့

ဖြတ်သန်းရတဲ့ လမ်းမှာ

ကံဥာဏ်ဝီရိယဆိုတဲ့ နှင်တံနဲ့

ကိုယ့်ကိုကိုယ်မောင်း

အုပ်ထိန်းမှုကောင်းခဲ့တယ် ... ။

နာကျင်မှုတံတိုင်းလည်း

ကျောခိုင်းခဲ့တယ် ...

ဝေးကွာမှုပင်လယ်လည်း

ကမ်းလွန်ခဲ့တယ် ...

အလွမ်းဆိုတာတော့

လူသားတိုင်းနဲ့ ထပ်တူထပ်မျှပေါ့  ... ။

နတ်သမီးပေမယ့် တချက်မငြီးခဲ့ပါဘူး ... ။

လိုရာကိုထုဆစ် ကျူးရင့်ဖို့ဆို

မြူးဇစ်နဲ့လည်း ထပ်တူကြတယ် ... ။

အရူးရင့်မယ့် ကံကြမ္မာလည်း

တူးခြစ်လို့ အကောင်းမြင်

ပူးဆစ်လို့ ပေါင်းသင်ခဲ့တယ် ... ။

ဝါသနာကိုရှေးရှု ကဗျာတွေပြုလို့

စာအစုစုကိုလည်း ကလောင်မှုပြုခဲ့တယ် ... ။

သူ ... အဖြူရောင်နတ်သမီး

ယူဆောင်ခြင်းအလင်းလေးနဲ့

လေထဲက ဖယောင်းတိုင်လို

ပူလောင်ခြင်း ကင်းဝေးစွာ

စေတနာဒလဗွနဲ့ ဒဏ်ရာတွေရနေပ(ပါ)စေ

လူသားအကျိုးပြုဖို့

လောင်ကျွမ်းသမှု ပြုခဲ့တယ် ... ။

ဒီလိုနဲ့ နိုဝင်ဘာ (၁၉)

နေ့ပျိုးရက်တစ်ရက်မှာ

နတ်သမီးမွေးနေ့

ချက်ချင်းစေ့တော့မယ် ... ။

ပြန်ကြည့်လိုက်ပါ ... နတ်သမီးရဲ့ဒိုင်ယာရီ

လျှောက်ခဲ့သမျှ ခြေလှမ်းတိုင်းဟာ

စမ်းတ၀ါးဝါးမဖြစ်ခဲ့ဘူး ... ။

ဖောက်ခဲ့သမျှ လမ်းတိုင်းဟာလည်း

တကိုယ်ကောင်းအတွက် မဟုတ်ခဲ့ဘူး ... ။

ကိုယ်ကောင်းရင် ခေါင်းမရွေ့

အကြောင်းမရွှေ့သရွေ့တော့

လူသားထုအကြား ရွေ့လျားနေမယ် ... ။

ကမ္ဘာတွေ ပျက်သုဉ်းလို့

မဟာမြေ တဖက်လုံးမှာ

မြေဆီလွှာတွေ ခမ်းခြောက်

ရေတာတွေ ကျိုးပေါက်ကုန်ရင်တောင်

နတ်သမီး အဆင်းနဲ့

ချက်ချင်း လင်းလိုက်မယ် ...

ကမ္ဘာမြေအတွက်ဆို

ထာဝစဉ်စောင့်ကြပ်မယ့်

သူ ... အဖြူရောင်နတ်သမီး ... ။

~~~~~~~~

ခင်မင်လေးစားမှုဖြင့်

ညရဲ့ကောင်းကင်

အချစ်ကြောင့် ကျိုးကြေသွားရခြင်း

တစ်နေ့... အဲဒီနေ့ကပေါ့။ ဘယ်လိုမှ မျှော်လင့်မထားတဲ့ တစ်နေ့။ မျှော်လင့်ချက်များစွာနဲ့ ရှင်သန်ခဲ့ရတဲ့ ဘ၀။ အချစ်ဆုံးသူ တစ်ယောက်ရဲ့ အားပေးစကားတွေနဲ့ အားပြုနေတဲ့ အချိန်။ ဘယ်လိုမှ ထင်မှတ်မထားခဲ့မိပါဘူး။ ကြားလိုက်ရတဲ့စကားက ရှေ့မဆက်နိုင်တော့ဘူးတဲ့။ ဘာလို့လဲ...ဘာလို့လဲ။ အကြောင်းပြချက်က သိပ်မလှပခဲ့ပါဘူး။ သေဆုံးသွားတဲ့ လူတစ်ယောက်အပေါ်ပဲ ချစ်သွားချင်တော့လို့တဲ့။ သေဆုံးသွားတဲ့ လူတစ်ယောက် အပေါ်ကိုသစ္စာမမဲ့ချင်ဘူးတဲ့။ ဒါဖြစ်နိုင်ပါ့မလား စိတ်ထဲမှာ လုံးဝလက်မခံချင်ဘူး။ ငါ့ကိုချစ်ခဲ့မိတာလည်း ပထမဆုံးနဲ့ နောက်ဆုံးအမှားပါတဲ့။ ခွင့်လွှတ် နားလည်ပေးပါတဲ့။ ငါဘယ်လိုလုပ်ရမလဲ။  စဉ်းစားကြည့်လိုက်တိုင်း ဘယ်လိုမှမယုံနိုင်ခဲ့ဘူး။ ဘယ်လိုမှလည်း ဆက်ပြီးမယုံကြည်နိုင်ပါဘူး။ ဒါပေမယ့် အသည်းတွေ အထပ်ထပ်နဲ့ ဟက်တက်ကွဲခဲ့ပြီပေါ့ဗျာ။ မျှော်လင့်ချက်တွေနဲ့ တည်ဆောက်ထားတဲ့ စိတ်ကူးတွေ၊ ကိုယ့်ကိုကိုယ် ပေးထားခဲ့တဲ့ ကတိတွေနဲ့ ငါဘယ်လို ရှေ့ဆက်ရတော့မှာလဲ။ ရင်ထဲမှာ ရူးလောက်အောင် ခံစားနေရတယ်။ မင်းကို ချစ်ခဲ့တာ အပေါ်ယံ သဘောမျိုးနဲ့ မဟုတ်ခဲ့ရပါဘူး။ တကယ့်ကို နှစ်နှစ်ကာကာနဲ့ ချစ်ခဲ့တာပါ။ မြေနီကုန်း တနေရာမှာ မင်းကို စတွေ့လိုက်ရကတည်းက ဖြစ်ပေါ်ခဲ့တဲ့ အချစ်ပါ။ မင်းဆီက အဖြေကို ရခဲ့ရတဲ့ နေ့ကစပြီး  ငါပျော်ရွှင်ခဲ့ရတာပါ။ မင်းမမှားပါဘူး။ ငါ့ကို ချစ်ခဲ့တာလည်း မင်းမမှားပါဘူး။ သေဆုံးသွားတဲ့ တစ်ယောက်အပေါ်ကို မင်းဘယ်လောက်တောင် ချစ်လဲဆိုတာ ငါနားလည်ပေးနိုင်ပါတယ်။ ဘာလို့လဲဆိုတော့ မင်းသူ့ကိုချစ်သလိုမျိုး ငါလည်း မင်းအပေါ်ကို ချစ်ခဲ့မိလို့ပါပဲ။ ဘာမှမပိုင်ဆိုင်တဲ့ ငါ့ဘ၀ကို တခဏဖြည့်ဆီးပေးခဲ့တဲ့ အတွက် ကျေးဇူးပါ။ မင်းအတွက်နဲ့ အင်အားတွေ ဖြစ်ပေါ်ခဲ့ရတဲ့ အတွက်လည်း ကျေးဇူးပါ။ ငါ့စိတ်ကို မင်းနားအလည်ဆုံးလို့ ပြောခဲ့တဲ့အတွက်လည်း ကျေးဇူးပါ။ ငါပို့သမျှ မေးတိုင်းကို ဖတ်ပေးခဲ့တာလည်းကျေးဇူးပါ။ မင်းဘက်က ပြတ်သားနိုင်ရင်တောင် ငါ့ဘက်ကတော့ အရင်အတိုင်းပဲ ဆက်ချစ်နေမှာပါ။ အစိတ်စိတ်အမွှာမွှာကွဲခဲ့ရတဲ့ အသည်းဆိုတာ စုတ်ပြတ်သတ်...လောက်အောင်ပါပဲ။ ရင်နင့်အောင်လည်း ခံစားရတယ်။ ငါ့အတွက်ကြောင့် စိတ်ရှုပ်နေရမယ် ဆိုရင် မင်းကိုတောင်းပန်ပါတယ်။ လူတစ်ယောက်အပေါ်ကိုပဲ စွဲစွဲမြဲမြဲ ချစ်တတ်တဲ့ မင်းကို ငါအရမ်းလေးစားမိပါတယ်။ ငါကတော့ အစကတည်းက ဆုံးရှုံးခြင်းတွေကိုပဲ ရရှိခဲ့တာပါ။  မင်းစိတ်ထဲမှာ ငါ့ကိုဦးစားပေးခဲ့တယ်။ သံယောဇဉ် ရှိခဲ့တယ်ဆိုတာ ငါသိပါတယ်။ ငါဟာ ကံမကောင်းခဲ့တဲ့သူပါ။ အရာရာတိုင်းကို ရရှိပြီးမှ ဆုံးရှုံးခဲ့ရတာပါ။ ဒါပေမယ့် ငါကျေနပ်ပါတယ်။ မင်းနှုတ်ခမ်းဖျားက ငါ့ကို ချစ်ပါတယ်ဆိုတာ ကြားခဲ့ရလို့ပဲ။ မင်းကိုနားလည်ပေးသလို ငါ့ကိုလည်း နားလည်ပေး စေချင်ပါတယ်။ ဒါပေမယ့် ချစ်သူရယ် မင်းဘ၀မှာ အားကိုအားထားပြုဖို့ ယောက်ကျားတစ်ယောက် ဘ၀တခုထူထောင်ဖို့ လူတစ်ယောက်လိုလာခဲ့ရင် ငါ့ကိုဦးစားပေးအနေနဲ့ စဉ်းစားပေးပါ။ ဘာလ်ို့လဲဆိုတော့ ငါအမြဲတမ်း စောင့်မျှော်နေမှာမို့လို့ပါ။ မင်းပြောခဲ့သလို့ပဲဆို ငါသည်လည်း အခုရော နောင်ရော မင်းရဲ့ ထာဝရချစ်သူပဲ ဖြစ်စေရမယ်။ ခုဘ၀မှာ မပေါင်းဆုံနိုင်လို့ နောင်ဘ၀ဆိုတာရခဲ့ရင် မင်းရဲ့ ချစ်ခြင်းကို ခံရတဲ့ လူသားတစ်ယောက် ထပ်ဖြစ်ရပါစေ။ ငါတောင်းဆုပြုပါတယ်။ ငါ့ကို တယူသန်တယ်လို့လည်း မပြောပါနဲ့။ မင်းပြန်လာနိုင်ဖို့ကို ငါ့ရင်ခွင်တံခါးကို အမြဲတမ်း ဖွင့်ပေးထားပါမယ်။ ဘယ်အချိန် ဘယ်အခါပဲ ဖြစ်ဖြစ်ပြန်လာခဲ့ပါ။ လူတစ်ယောက်ကို ချစ်ခဲ့တာ တဘ၀လုံးအတွက် ဆိုရင် သေဆုံးသည်အထိ ချစ်သွားပါရစေ။ မင်းကိုပေးခဲ့တဲ့ ကတိ ဖျက်လိုက်တော့မယ်။ နောင်ဘယ်တော့မှ မငိုတော့ပါဘူး ဆိုတာ။ ငါငိုမယ်...မင်းကိုသတိရတိုင်းငိုမယ်...လွမ်းတိုင်းငိုမယ်။ မျက်လုံးတွေ ပေါက်ထွက်ပါစေ ငါငိုမယ်။ နောက်ပြီး သေချာတာက မင်းးဓာတ်ပုံလေးတွေကို ငါ့ရဲ့ခေါင်းအုန်းအောက်မှာ တသက်လုံး ထားသွားဖြစ်မှာပါ။ ညအိပ်တိုင်းမင်းအတွက်  ဆုတောင်းပေးနေမိမှာပါ။ ငါသိပ်ချစ်ရတဲ့ ချစ်သူစိတ်ဆင်းရဲတာ မခံချင်ပါဘူး။ အချစ်ဆိုတာ ပေးဆပ်ခြင်းဆိုရင် ထာဝရပေးဆပ်ခွင့်ကြုံပါရစေ။ မင်းပျော်ရွှင်မယ်ဆို ငါမျက်ရည်တွေနဲ့ သွေးချောင်းစီးပေးပါ့မယ်။ ဒါပေမယ့် မင်းပျော်ရွှင်အောင် ရှင်သန်နိုင်အောင်ကြိုးစားပါ။ အရာရာကို တရားနဲ့ မြင်တက်ဖို့ ကြိုးစားပါ။ ငါမင်းကို သိပ်ချစ်တယ်။ မနက်ဖြန်ဆို မင်းနဲ့ငါနဲ့ ချစ်သူသက်တမ်း  အက္ခရာတွေတိုးတော့မယ်။  အချိန်ကာလက ဘယ်လောက်မှ မကြာသေးပေမယ့် ငါ့ရဲ့ အချစ်တွေကတော့ နှစ်တွေရာထောင်ချီသလောက်ပါပဲ။ ငါလည်းတတ်နိုင်သလောက် ကြိုးစားပါ့မယ်။ မင်းတချိန်ငါ့ဆီကို ပြန်လာနိုင်ခဲ့ရင် တည်ငြိမ်နေတဲ့ ယောက်ကျားတစ်ယောက် မင်းလက်တွဲနိုင်လောက်မယ့် ယောက်ကျား တစ်ယောက် ဖြစ်အောင် ကြိုးစားပါ့မယ်။ အချိန်တိုင်းသတိရနေပါ့မယ်။ အချိန်တိုင်းတမ်းတနေပါ့မယ်။ မင်းသိပ်ချစ်တဲ့ မိုးတွေထဲမှာ နေတတ်အောင်လည်း ကြိုးစားပါ့မယ်။ မင်းအတွက် ငါရည်ရွယ်ထားတဲ့ ဆန္ဒကိုလည်း ဖြစ်အောင်လုပ်မယ်။ မင်းအတွက်စီစဉ်ထားတာတွေ အများကြီးပါ။ စိတ်ကူးတွေနဲ့ တည်ဆောက်ထားတဲ့ အနာဂါတ်ခရီးတွေလည်း အများကြီးပါ။ အဲဒီအစီအစဉ်တွေကို ငါဖြစ်အောင်လုပ်မှာပါ။ တချိန်ချိန်ဆိုတာ ငါ့အတွက် တကယ်ရှိခဲ့ရင် ရည်ရွယ်ချက်လေး အကောင်အထည်ပေါ်ပါရစေ။ မင်းကိုတခု အကြံပေးချင်ပါတယ်။ တတ်နိုင်သလောက် စိတ်ငြိမ်းချမ်းအောင် ကြိုးစားပါ။ လူဆိုတာ ကိုယ့်ကံနဲ့ကို ကိုယ်လာတာပါ။ ရှေးဘ၀က ပြုခဲ့တဲ့ကုသိုလ်ကံကြောင့် ဒီဘ၀ရဲ့ သက်တမ်းဟာ တိုရတယ် ရှည်ရတယ်ဆိုတာ ငါတော့ ယုံကြည်တယ်။ ဖြစ်နေတဲ့ အဖြစ်မှန်ကို လက်ခံနိုင်အောင် ကြိုးစားပါ။ နောက်ဆုံးအနေနဲ့ တခုပဲ တောင်းဆိုပါရစေ။ ငါ့ကိုမမုန်းပါနဲ့။ ငါ့ကို ချစ်ခဲ့တယ်ဆိုတာ လက်ခံပေးကြည့်ပါ။ မင်းအတွက်ကြောင့် သူဟာသေဆုံးခဲ့ရတယ် ။ မင်းပရောဂ မကင်းဘူးဆိုပြီး စိတ်ထဲမှာဖြစ်နေမယ်။ အဲဒါတောင် မင်းကငါနဲ့ ပျော်ရွှင်နေမိတယ်။ သူ့အတွက် မတရားဘူးလို့လည်း မတွေးပါနဲ့။ လူတစ်ယောက်အပေါ်ကို မတရားဘူးဆိုရင် တခြားလူတစ်ယောက် အတွက်ကော တရားပါ့မလား။ ဘာပဲဖြစ်ဖြစ် မင်းစိတ်ကို တည်ငြိမ်မှု ရစေချင်တယ်။ နောက်ထပ် ငါထပ်ပြောပါရစေ။ ငါကလည်း မင်းအတွက် ထာဝရ ချစ်သူပါ။ အခုရော နောင်ရော ထာဝရချစ်သူပါ။ မင်းစိတ်ပျော်ရွှင်စွာနဲ့ အစစအရာရာ အဆင်ပြေပြီး အနာဂါတ်ခရီးလမ်းကို ဖြောင့်ဖြူးစွာ လျှောက်လှမ်းနိုင်ပါစေ။

မိုးရွာတယ်ဆိုတာ မိုးဥတုကုန်ဆုံးတဲ့ အထိပါပဲ။ ငါ့ရင်ထဲမှာ ရွာနေတဲ့ မိုးကတော့ ရာသီမရွေး အချိန်တိုင်းပါ။
ပျော်ရွှင်ခွင့် မရခဲ့တဲ့ ငါ့ရဲ့ ဒီဘ၀အတွက် နာကျင်မှုတွေကိုသာ အဖော်အဖြစ်နဲ့ပေါ့ ငါနေတတ်အောင်ကြိုးစားပါ့မယ်။ ဒါပေမယ့် မင်းနားခိုချင်ရင် အချိန်မရွေး ပျံသန်းလာခဲ့ပါ။ သစ်အိုပင် တစ်ပင်က ပုပ်ဆွေးနေတဲ့ အထိ စောင့်မျှော်နေပါမယ်လို့။

အသက်ရှုရှိုက်လိုက်တိုင်းမှာ

လေထဲက ပွင့်ဖတ်တွေက

ငါ့ရင်ကိုလာလာရိုက်တယ်...

ခံလိုက်ရတာ သေမတတ်ပဲ...

ကိုးကွယ်ခဲ့တဲ့ နတ်ဖုရားမ

ကျိန်စာတွေ အပြွတ်လိုက်

စီမံလိုက်လို့လားမသိ

ဒီနှလုံးသားကိုပဲ

လာလာတိုးနေကြတယ်...

ဘယ်ဘ၀ အငြိုးရယ်ကြောင့်

ဒီဘ၀ ညှိုးငယ်နေရတာလဲ

တချက်မတိုးမကျယ်လေးနဲ့

ငါ့ဆီကို အလည်လာခဲ့ပါဦး

ကြွေနွမ်းတဲ့ နှလုံးသားပေမယ့်

သေလမ်းသို့မသွားခင်အထိတော့

ဒီလမ်းမှာ စောင့်စောင့်နေပါမယ်...

စောင့်စောင့်နေပါမယ်...

စောင့်နေပါမယ်..

စောင့်

နေ

ပါ

မယ်

~~~~~~~~~~~~~

“ကမ္ဘာကြွေမယ့် တစ်နေ့ရောက်ခဲ့ရင်”

အမှန်ကို ၀န်ခံပါသည်။ တခါမှ တက်ဂ်မခံရဖူးပါ။ ပိုဆိုးတာက ဒီခေါင်းစဉ်.. ဒီအကြောင်းကို မေ့ထားတာ  (ကြောက်လို့)။ ကျွန်တော့်ကို တက်ဂ်ဖော်ရတဲ့ ကိုဏီလင်းညို (ဒုက္ခပေးဖော်လည်းရတယ် .. စတာနော်)ကို ကျေးဇူးတင်ပါတယ်လို့ ဒီနေရာကနေ ပြောပါရစေ...။ ကျွန်တော် တက်ဂ်ပို့စ်တခါမှ မရေးဖူးတဲ့အတွက် အမှားများပါခဲ့ရင် ခွင့်လွှတ်ပါလို့ ကြိုပြီးတောင်းပန်ပါရစေ။ တတ်နိုင်သလောက်ကို ကြိုးစားပြီး ... ရေးပေးလိုက်ပါတယ်။

နောက်ပြီး ကျွန်တော်စိတ်ကူးတွေပုံဖော်ခဲ့တဲ့ ဒီဒိုင်ယာရီလေးမှာ ခုလိုမျိုး ညီအစ်ကို မောင်နှမတွေနဲ့ တွေ့ဆုံ ခွင့်ရလို့ အရမ်းကိုပဲ ၀မ်းသာပျော်ရွှင်မိပါတယ်။

~~~~~~~~

ကမ္ဘာကြီးပျက်တော့မယ်ဆိုရင်ပေါ့လေ ...

(၁) ဘယ်သူတွေနဲ့ရှိနေချင်လဲ…

ကျွန်တော် ရှိနေချင်တာက ကျွန်တော်ချစ်တဲ့ မိသားစုနဲ့အတူပါ။ ဆိုးတူကောင်းဖက်နဲ့ အတူတူအခြေချခဲ့ပြီးမှ ကြွေလွင့်ရမယ်ဆိုလည်း အတူတူ ကြွေလွင့်ချင်ပါတယ်။ အတူတူရင်ဆိုင်ချင်ပါတယ်။ ကျွန်တော်တို့ မိသားစုက ဆွေမျိုးကင်းပါတယ်။ လိုရင်လာတတ်ပြီး မလိုရင် စိတ်ကူးထဲတောင်မထည့်တဲ့ ဆွေမျိုးတွေကို လျစ်လျူရှုထားတာ ကြာခဲ့ပါပြီ။ အောက်ခြေကစပြီး ထူထောင်လာခဲ့ရတဲ့ မိသားစု သက်တမ်းမှာ ကိုယ်တိုင်ပါဝင် ခံစားခဲ့ရတဲ့ အတွက် နောက်ဆုံးခရီး ဆိုရင်တောင် ဒီမိသားစုနဲ့ပဲ ကျော်ဖြတ်ချင်ပါတယ်။

(၂) ဘာတွေခံစားနေရလဲ…

ခံစားနေရတာတော့ ပိုပြီးသာယာပျော်ရွှင်မယ့် မိသားစုတစ်စု (ကျွန်တော်သိပ်ချစ်ရတဲ့ ကျွန်တော့်အပေါ် အနိုင်ယူလွန်းအားကြီးတဲ့ ကောင်မလေးနဲ့အတူ) မဖန်တီးနိုင်ခင်မှာ ပျက်သုဉ်းရမှာကိုပဲ။ နောက်ပြီး ရည်ရွယ်ချက်တခုနဲ့ ခွဲခါလာခဲ့ပြီးမှ မပြည့်စုံပဲ တန်းလန်းကြီး ထွက်သွားရမှာကို နှမြောနေမိတယ်။

(၃) ဘာတွေပြင်ဆင်ထားမလဲ…

ပြင်ဆင်သင့်တာတွေကတော့ အများကြီးပါ။ ရတနာသုံးပါးကို နှလုံးသွင်းတတ်ဖို့။ ကုသိုလ်ကောင်းမှုကို တတ်နိုင်သလောက် လုပ်သွားနိုင်ဖို့ လိုအပ်ပါတယ်။ ဒီလိုတိုတောင်းလှတဲ့ ကျန်ရှိတဲ့ အချိန်လေးမှာ သူတဖက်သားအပေါ်ကို အပြစ်မလုပ်မိဖို့လည်း ပိုအရေးကြီးပါတယ်။ နာကျည်းစရာတွေရှိရင် မေ့လိုက်မယ်။ မုန်းလောက်မယ့် သူတွေရှိခဲ့ရင်လည်း အဆုံးထိတိုင် ခွင့်လွှတ်လိုက်မယ်။ ရိုးသားတဲ့ဘ၀လေးနဲ့ပဲ တတ်နိုင်သလောက် ရှေ့ဆက်မယ်။

(၄) ၀မ်းနည်းမိမှာက…

ဝမ်းနည်းမိမှာကတော့ မိဘကျေးဇူးကို ဆပ်ရမယ့် အချိန်တွေ တိုသွားလို့ပါ။ ယုံကြည်ချက်တခုနဲ့ မဖြစ်ဖြစ်အောင် လျှောက်လာခဲ့ပြီး မိဘရဲ့ အကူအညီကို ခုထိတောင်းခံနေရတဲ့ အတွက် အပြစ်တခုလို ခံစားနေရတဲ့အချိန်မှာ မိဘကို လုပ်ကျွေးပြုစုဖို့ အချိန်တွေနည်းသွားလို့ပါ။ နောက်ပြီး ကျွန်တော်တို့ သက်ဝင်ယုံကြည် ကိုးကွယ်ခဲ့တဲ့ ဗုဒ္ဓဘာသာပါ ကွယ်ပျောက်သွားခဲ့မယ်ဆိုရင်တော့ အရမ်းဝမ်းနည်းမိမှာပါ (ကမ္ဘာပျက်သုဉ်းရင်တောင် ဗုဒ္ဓဘာသာကို အရှည်တည်တံ့နေစေချင်ပါတယ်) ။

(၅) ကြောက်လန့်မိတာက…

ကြောက်လန့်မိတာက သိပ်မရှိပါဘူး ... သေရမှာ တခုတည်းပါး) ။ သေရင်တော့ အားလုံးထက်အရင် သေသွားချင်ပါတယ်။ ကျွန်တော်က နှလုံးသားနုတယ်။ အော်ပြီးငိုယိုနေကြတဲ့ လူသားတွေအားလုံးကို မမြင်ချင်ပါဘူး။ နှလုံးသားရပ်ပြီး သေသွားမှာတော့ကြောက်တယ်။ အဟီး အဲဒါကြောင့်း) ။

(၆) ဆောင်ထားချင်တာ…

ဆောင်ထားချင်တာက ကျွန်တော်တို့ ယုံကြည်ကိုးစားရတဲ့ ရတနာသုံးပါးပါ။ နောက်ပြီး လောကမှာ ဘယ်အရာမှ တည်မြဲခြင်းမရှိဘူး “ပျက်ချိန်တန်လို့ ပျက်တယ်” ဆိုတဲ့ ဗုဒ္ဓရဲ့အဆုံးအမလေးတခုပါ  (ပြောတာပြောချင်တာ သေချာမပြောတတ်လို့ဗျ) ။

(၇) ဘာတွေရေးမိမလဲ…

ရေးမိမှာကတော့ ကဗျာတွေပါပဲ။ ကဗျာကို အသက်လောက် ချစ်မြတ်နိုးတဲ့အတွက် ကဗျာတွေကိုပဲ ထုဆစ်မိနေအုန်းမှာပါ။ ကျွန်တော့်ကို တခြားအရာနဲ့ ဆွယ်လို့နေနိုင်ပေမယ့် “ကဗျာ” နဲ့ဆွယ်ရင် ကောက်ကောက်ပါအောင်လိုက်မိမှာ သေချာတယ်း) ။

(ဂ) တွေးမိတွေးရာ...

ကျန်ရှိတဲ့ အချိန်လေးကို ကြိုးစားမယ်။ ကောင်းကောင်းစားမယ်။ ကောင်းကောင်းနေမယ်။ မည်သူ့အပေါ်မှ ကာယကံ ၊ ၀ဇီကံ ၊ မနောကံ တို့ဖြင့် မကျူးလွန်မိအောင် နေထိုင်သွားမယ်။ ဘုရားတရားကို အချိန်ပေးပြီး လုပ်သွားမယ်လို့တော့ စဉ်းစားပါတယ်။

(၉) ဂုဏ်ယူချင်တာက…

ယခုဘ၀မှာ လူလာဖြစ်ရတာကို ဂုဏ်ယူချင်ပါတယ်။ ခံစားတတ်တဲ့ နှလုံးသားတစုံလည်း ရရှိခဲ့တယ် (အဲဒါကြောင့် ကဗျာတွေရေးနိုင်ခဲ့ရတာကိုး) ။ ပျော်ရွှင်မှုရသ အ၀၀ကိုလည်း ခံစားခဲ့ရတယ်။ ၀မ်းနည်း ကြေကွဲမှုတွေလည်း ကြုံတွေ့ခဲ့ရတယ်။ လူဆိုတဲ့ အတန်းအစားရဲ့ ခံစားရမှု အစုံစုံကို ခံစားခဲ့ရလို့ပါပဲ ။

(၁၀) ရှာကြံဖြေသိမ့်မိတာက…

တော်သေးတာပေါ့ အရမ်းချစ်ရတဲ့ ကောင်မလေးတစ်ယောက်ရဲ့ အချစ်ကိုခံခဲ့ရလို့ (လူပျိုကြီးဖြစ်သွားမှာ တော်တော်ကြောက်နေတာ :P) ။ ကောင်မလေးက လက်ခံရင် ပျော်ရွှင်ရမယ့် မိသားစုလေးကို ဖန်ဆင်းဖို့ အချိန်ကျန်နေသေးလို့ (သိပ်တော့မကျန်တော့ဘူးနော် အဟီးဟီး ငိုချင်လာပြီနော် ) ။

(၁၁) ကျူးရင့်ချင်တဲ့ ဥဒါန်း...

ကျူးရင့်ချင်တာကတော့ ကဗျာလေးတပုဒ်နဲ့ပေါ့ (ကဗျာရူးဖြစ်နေလို့ပါ သီးခံကြပါနော်)

ကမ္ဘာ...ကမ္ဘာ...ကမ္ဘာ
သူ့ နှလုံးသားကို အမှီပြု
ငါတို့ပေါက်ဖွားခဲ့တယ် ။

သူ့ သယံဇာတကို တူးယူ
ငါတို့ တည်မြဲယူခဲ့တယ် ။

သူ့ ၀မ်းတွင်းကျွမ်းလောင် 

ပြိုပျက်အောင်လို့
ငါတို့ အပြစ်ဆောင်ခဲ့တယ် ။

သူ့ အရိပ်အောက်မှာနေ
သူ့ အခက်ဘယ်လိုချိုးချိုး
ငါတို့စေရာ သူခံခဲ့တယ် ။

သူကတော့ ခွင့်လွှတ်သီးခံ
စိတ်ရင်းမှန်နဲ့
ငါတို့ကောင်းကြောင်း
သွန်းလောင်းပေးခဲ့တယ် ။

ငါတို့ ကတော့ သူ့ကို
လျစ်လျူရှုလို့ အပြစ်တွေပြုခဲ့တယ် ။

ခုမှ သူ့ကို သတိရကြောင်း
စာတွေလောင်းလည်း
သူအကြောင်းက မကောင်းတော့ဘူး ။

သူငိုနေတယ်
ဝမ်းသာလို့လား ၀မ်းနည်းလို့လား
အဖြေရှာမရတဲ့ ဝေဒနာဘ၀နဲ့
သေချာတာက
သူခေါ်ဆောင်သွားတော့မယ် ။

ငါတို့ မလိုက်ချင်လည်း
လိုက်ပါရတော့မယ် ။

ငါတို့ကို ချစ်ခဲ့တဲ့ သူ့ကို
ငါတို့ ပြန်ချစ်ကြပါစို့ ။

အခုတော့
ငါတို့အားလုံး
ကမ္ဘာကြီးကို တောင်းဆုခြွေကြမယ် ။

“ ကမ္ဘာမြေ ငြိမ်းချမ်းပါစေ
  ကြွေလွင့်မသွားခင် အထိလေ
  ကမ္ဘာမြေ ငြိမ်းချမ်းပါစေ
  ငါတို့နဲ့အတူ ရှိပါစေ ”

(ကိုငှက်ရဲ့ သီချင်းကို ဖျက်လိုက်မိတာ အားလုံးကို တောင်းပန်ပါတယ်ဗျာ)

~~~~~~~~~

အားလုံးကို ခင်မင်လေးစားလျက်...
     ညရဲ့ကောင်းကင်

“အင်အား”

ညတွေက  တိတ်ဆိတ်မှုကို
အရိပ်လိုပြုလို့  မြှောက်ပင့်ကြတယ် ...

ဘ၀တွေက  ထိုးနှက်မှုကြောင့်
တချို့  ကတိုးတက်
တချို့  ကစိတ်ပျက်ကြတယ် ...

ကုန်းကောက်စရာမရှိပေမယ့်
ရုန်းလောက်တဲ့အင်အားနဲ့
လုံ့လများရဲ့အောက်မှာတော့
အကြောက်တရားဆိုတာ
ဖောက်ပြားစရာကို မလိုခဲ့တာ ...

လဲကျရင် ထလိုက်မယ်
ထူမယ့်သူကို မမျှော်ဘူး...
နွမ်းလျှရင် ကလိုက်မယ်
အားပေးသူမရှိလည်း ဖြစ်တယ် ...

ကိုယ့်စိတ်နဲ့ ကိုယ့်အရိပ်
တွဲနေသေးသရွေ့
ဘယ်လမ်းဘယ်လောက်ဝေးပစေ
မျှော်မှန်းတဲ့အတိုင်း လျှောက်လှမ်းရဲတယ် ...

မရှိတဲ့ ကံကိုလည်း မတောင့်တဘူး ...
ရှိတဲ့ ဥာဏ်ကိုပဲ ရောင်းချမယ် ...
ဝီရိယကို စိုက်ထုတ်
ကာယအလုပ် လုပ်လည်းဖြစ်တယ် ...

ဒူးမခေါက်သရွေ့   ဒူးမထောက်ဘူး...

ဘေးမရောက်သရွေ့   ပြေးမကြောက်ဘူး...

ဘ၀ကို ခုတုံးလုပ်

လူလုံးပြုတ်လဲ အပူရုပ်တော့မလုပ်ဘူး ...

ကိုယ့်လက်နဲ့ ကိုယ့်ခြေ

သက်သေတွေတည်မယ် ...

ကိုယ့်ကိုကိုယ်မာန်တင်း

ဖန်ဆင်းရဲတယ် ...

နာကျင်မယ့် ကြမ္မာတွေ

လာချင်လည်းလာပါစေ ...

ကိုယ့်မိသားစုအတွက်

ဘ၀ကိုကိုယ်စားပြု

အနာဂါတ်ကိုထုဆစ်မယ် ...

ဆုဖြစ်မယ့်အတွေးတွေနဲ့

လျှောက်လှမ်းမယ့်လမ်းကတော့

မဝေးတော့ပါဘူးလေ ... ။

☺ ငါ့ရဲ့ လမင်း ☺

ရှင်းသန့်တဲ့ ရင်ခွင်မှာ

အစဉ်ထွန်းလင်းနေတဲ့ လမင်း

ပြည့်ဖြိုးနေလိုက်တာက

လှရက်လိုက်တာ ... ။

မဟူရာညပေမယ့်

မတူတာတခုကတော့

နင်ဖြန့်ကျက်တဲ့ အလင်း

ငါ့ရင်ကိုခင်းထားတာက

လွမ်းမောလိုက်တာ ... ။

အရာရာ တိတ်ဆိတ်နေပေမယ့်

အလိုက်မသိတာက ... ငါ

ရှိုက်မိတဲ့လေထုနဲ့တောင်

ဝင်သက်ထွက်သက် မမျှသလိုနဲ့

သန်းခေါင်ယံညဉ့်အဆင်းမှာ

အသူရာတွေစစ်ခင်းသလို

အမူအရာတွေပစ်သွင်းရင်း

အငိုက်မိတဲ့ နှလုံးသားနဲ့

ငါ ... မောက်မားမိခဲ့တာပေါ့ ... ။

ဒါပေမယ့်လည်း

ရင်ထဲကလမင်းမို့

အပြစ်ကင်းတဲ့ မြှားတစင်းကို

နင့် ရင်တွင်းသို့

ချစ်ခြင်းစေတမန်နဲ့

ဖြစ်ခြင်းတွေ အစီရင်ခံလိုက်မယ်

နင့်ရဲ့  ...

နှလုံးသားကို

ငါ့ဆီ ...

တဖန် ပို့လွှတ်လှည့်ပါ ... ။

သခင်

တွယ်ငင်ရစ်သည့်

နှောင်ကြိုးမျှင်ဖြင့်

ပတ်ကာထားသည့်

သံယောဇဉ်မျိုး

ရင်၌ပျိုးသည်

သခင်သိပါလေစ ။

လွန်ခိုင်မြဲသည့်

စကားထွေနှင့်

ချိုမြိန်လှသည့်

အချစ်နွံမျိုး

ရင်၌ကျွံသည်

သခင်သိပါလေစ ။

သခင်စိတ်ဖောက်

ကောက်မှာစိုးလို့

စိုးကြောက်ရင်ထဲ

မ၀ံ့ရဲပဲ

ဆိတ်ဆိတ်ငြိမ်သက်

သခင့်တွက်ဆို

နေ့ရက်မတွက်

ပေးဆပ်ရက်သည်

သခင်သိပါလေစ ။

သခင့်ရိပ်နှင့်

ကျွန်ုပ်စိတ်ဒွန်တွဲ

လွန်ဆွဲမိတောင်

တရက်သော်မှ

မျက်တော်မရှ

အပါးတော်မြဲ

နေရဲချင်သည်

သခင်သိပါလေစ ။

သခင်မုန်းလို့

ရှုံးသွားရင်လည်း

လုံးမပါးပဲ

နှလုံးသားကို

အပြုံးများနဲ့

ပေးဆပ်ရဲသည်

လိုရာပြုဖို့

ထုဆစ်ပါတော့

အို ... သခင်ရယ် ... ။

ကြောက်တတ်လာတယ်

မင်းပြောခဲ့တဲ့ စကား

တလုံးတပါးမှတောင်

အမုန်းမပွားခဲ့ဖူးပါ...

မင်းစေလိုရာစေ

နေလိုရာနေခဲ့တယ်... ။

ကြာပဒုမ္မာလို

ရေတကာလယ်မှာ

တင့်တယ်ချင်ပေမယ့် ...

ဒီကောင့် ...

နှလုံးသားရင်မှာတော့

ပြေလည်အောင်

သောင်ထွန်းခဲ့ရတယ် .... ။

ပန်းပွင့်ကြွေတိုင်းလည်း

မကောက်ခဲ့ဖူးပါ ... ။

လေပြေစေတိုင်းလည်း

မရောက်ခဲ့ဖူးပါ ... ။

ဒီကောင့် ...

နှလုံးသားစက္ကန့်တိုင်းကို

မင်းနာရီမှာ

ကုန်ဆုံးစေခဲ့တယ် ... ။

ဆုံးရှုံးမှာစိုးလို့

နာစရာရှိတောင်

ရင်ခွင်တွင်းနက်မှာပဲ

ပျိုပျက်ခဲ့တယ် ... ။

ဒါနဲ့တောင် ...

ဟန်ဆောင်စကားတွေနဲ့

ဒီကောင့်နှလုံးသားကို

မိုင်ကုန်မောင်းခဲ့ရက်တယ် ... ။

ဒီလိုနဲ့လေ ...

နှလုံးသားကရလာတဲ့

အဆိုးရွားဆုံးရလဒ်ကတော့

ဒီကောင်လေ ...

ကြောက် ... ကြောက်တတ်လာတယ် ... ။

မဆုံးမယ့် အတွေးများ

နေ့စဉ်ဖြတ်သန်းနေတဲ့ဘ၀
ဘယ်ကာလရွေ့ပြီမသိ
ပန်းမန်တွေကတော့
သူ့ဖာသာ အလှဆင်တတ်သားပဲ...
ဝင်ခါနီးနေမင်းတောင်
တောက်ပမှုတွေနဲ့

နှုတ်ဆက်လုလုပါလား...

ပုံမှန်လှုပ်ရှားမှုနဲ့

ရှင်သန်လူသားထုတွေကတော့
ကမ္ဘာမြေလှပမှုကို
အသေအချာ သတိမပြုမိတာ ကြာလှပေါ့...

တခါတခါ
အလှအပသဘာဝကို
အကျအနခံစားချင်လို့ပေါ့...
စိမ်းလန်းမှု တောအုပ်ထဲက
တိတ်ဆိတ်တဲ့ ညနေတွေမှာ
တယောက်တည်းကြိတ်လို့
အသက်ရှုသံကို ကာရန်လုပ်
သံစဉ်တပုဒ်တော့
ဟန်လုပ်ချင်ခဲ့တာလေ...

တကယ်တော့လည်း
ဆုတ်ဖြဲခဲ့တဲ့ ပြက္ခဒိန်တွေရဲ့အောက်မှာ
ပိုင်ဆိုင်မှုနဲ့ထပ်တူ

လွတ်လပ်မှုတွေကျဆုံးခဲ့ရတယ်လေ...

ဒီလိုနဲ့ပဲ...

အခါခါသာနေတဲ့
သော်တာလမင်းကိုလည်း
မျှော်ကာမကြည့်မိတာ ကြာလှပြီ ...

ဒဏ္ဍာရီ ဆန်လှတဲ့
ကြယ်စင်မောင်နှံကိုလည်း
ဖွေရှာမတွေးမိတာ တခါမကပြီ ...

ရင်မှာတွေးမိတဲ့
မဟာအတွေးတွေကိုလည်း
အသေအချာမရေးမိတာ

ဘယ်အချိန်ဘယ်ကာလဆီ ။

သြော်... ဒီနေ့ညဉ့်က ဘာလို့ဒီလောက်နက်ရတာလဲ.... ။

(မမိုးခါးဧ။် မဆုံးမယ့် အတွေးစုကို ကဗျာအဖြစ် ဖြစ်တည်သည်။)

ပုံ ။ ။ ခွင့်ပြုချက်ဖြင့်သာ ကျွန်တော့်ဧ။် ဘလော့ဂ်၌ တင်ပါဧ။်။

တကယ်ဆို စိုရုံလေးပါ

မရည်ရွယ်ခဲ့ပါဘူး

စိုရုံလေးပက်ဖြန်းစေချင်ခဲ့တာပါ

ဒါပေမယ့် ...

ရင်ထဲမှာ ၀ုန်းဒိုင်းကြဲတော့

အပြင်မှာ မိုးသည်းမိတာပေါ့ ... ။

မရည်ရွယ်ခဲ့ပါဘူး

မင်းတို့ရင်ကိုအေးချမ်းဖို့

အကြိမ်ကြိမ်ဖြစ်တည်ပြီးမှ

ဖွင့်ချမိတာပါ

အညှိုးကြီးတယ်ဆိုပြီးတော့

လူဆိုးကြီးလို့ မထင်လိုက်ကြပါနဲ့ .... ။

တခါတခါ

ငါမလာခဲ့ရင် တောင့်တကြပြီး

ငါရွာတော့မှ မဖျောင်းဖျကြတာလဲ ... ။

ငါ့ကို ...

အပြစ်တွေတင်ပြီးတော့

ရက်စွဲတွေကို ဒဏ်မခတ်လိုက်ပါနဲ့ ... ။

ချစ်တယ်ထင်ပြီးတော့လည်း

သွန်းနိုင်မှုကို အတင်းမပြုပါနဲ့ ... ။

ထောင်သောင်းမကတဲ့ ငွေ့ရည်တွေ

စုဆောင်းလို့မှ ဖြစ်လာတဲ့ ဘ၀

ငါရွာချင်ရင် ရွာမယ်

ငါသာချင်ရင် သာမယ်

ဒါငါ့ရဲ့ ဖြစ်တည်မှု ... ။

တခါတလေ

ငွေ့ရည်လေးတွေ ဖြစ်တည်ဖို့ အတွက်

ငါတကိုယ်ကောင်းဆန်ရလိမ့်မယ် ... ။

ဒါပေမယ့်

စိုရုံလေးပက်ဖြန်းစေချင်ခဲ့တာပါ ... ။

စိတ်ကူးလေးတခု

ကောင်းကင်က ငှက်တွေက မြေပြင်မှာ ပျော်မြူးချင်ကြတယ် ...
သူတို့လည်း ကျွန်တော်နဲ့တူလို့ ...
ကိုယ်သိပ်ချစ်ရတဲ့ ချစ်သူနဘေးမှာ နေချင်လို့ဖြစ်မယ် ...

ပန်းလေးတွေက လှလှပပဖူးပွင့်ကြတယ် ...နောက်ပြီး အခူးခံကြတယ် ...
သူတို့လည်း ကျွန်တော်နဲ့တူလို့ ..
ကိုယ်သိပ်ချစ်ရတဲ့ ချစ်သူကေသာမှာ ပန်စေချင်လို့ဖြစ်မယ် ...

လေပြေလေညှင်းလေးက ငြင်ငြင်သာသာတိုက်ခတ်ကြတယ် ...
သူတို့လည်း ကျွန်တော်နဲ့တူလို့ ...
ကိုယ်သိပ်ချစ်ရတဲ့ ချစ်သူရင်ကို အေးမြစေချင်လို့ဖြစ်မယ် ...

စမ်းချောင်းလေးက သာယာစွာ စီးဆင်းတယ် ...
သူတို့လည်း ကျွန်တော်နဲ့တူလို့ ...
ကိုယ်သိပ်ချစ်ရတဲ့ ချစ်သူကို အသံသာလေးတွေနဲ့ သာယာစေချင်လို့ဖြစ်မယ် ...

ကြယ်လေးတွေက တခါတခါကြွေကြပေးကြတယ် ...
သူတို့လည်း ကျွန်တော်နဲ့တူလို့ ...
ကိုယ်သိပ်ချစ်ရတဲ့ ချစ်သူ ဆုတောင်းလေးတွေပြည့်စေချင်လို့ဖြစ်မယ် ...

သူတို့လည်း ကျွန်တော်နဲ့ တူ ... လို့ ... တူ ... လို့ ။

ချစ်သူတွေငိုကြတယ် ... အဲဒါ ချစ်လို့ ။
ချစ်သူတွေရီကြတယ်... အဲဒါချစ်လို့ ။
ချစ်သူတွေပျော်ကြတယ် ... အဲဒါချစ်လို့ ။
အနမ်းလေးတွေ ပေးကြတယ် ... အဲဒါချစ်လို့ ။
လက်လေးတွေ တယုတယတွဲကြတယ် ... အဲဒါချစ်လို့ ။
သစ္စာကတိတွေ စောင့်ထိန်းကြတယ် ... အဲဒါချစ်လို့ ။
ပန်းခင်းလမ်းတွေကို အတူတူလျှောက်ကြတယ် ... အဲဒါချစ်လို့ ။
ဆူးခင်းလမ်းတွေကို ရဲဝံ့စွာဖြတ်ကျော်ကြတယ် ... အဲဒါချစ်လို့ ။
တစ်ယောက်ကိုတစ်ယောက် နားလည်ပေးကြတယ် ... အဲဒါချစ်လို့ ။
တစ်ယောက်စိတ်ဆိုးရင် တစ်ယောက်ချော့ကြတယ် ... အဲဒါချစ်လို့ ။
တစ်ယောက်ငိုရင် တစ်ယောက်ရင်နာရတယ်.....အဲဒါချစ်လို့ ။.
အဲဒီလောက်တောင် ချစ်ကြတယ့် ချစ်သူတွေ ပေါင်းဆုံကြပါတယ် ။
သူတို့လို ကျွန်တော်လည်း ပေါင်းဆုံစေချင်ပါတယ် ။

ကမ္ဘာကြီးကို နှစ်ယောက်တည်းနဲ့ပတ်လို့
ပျော်ရွှင်မှုတွေလွှမ်းခြုံပေးမယ့် အိမ်လေးရဲ့  ရင်ခွင်မှာ
တစ်ယောက်ရဲ့ ရင်ခုန်သံကို  တစ်ယောက်က ရှုစားလို့
ချိုမြိန်တဲ့ ညနေခင်းတွေကို အတူကျော်ဖြတ်လို့
အလွမ်းမပြေတဲ့ အလွမ်းတွေကို ပြန်ပြောင်းပြောလို့
လသာတဲ့ညတွေမှာ တီးတိုးကပ်လို့
ကောင်းကင်ကကြယ်တွေကို ရည်တွက်လို့ ...လို့ ... လို့......

သြော် ... စိတ်ကူးအိပ်မက်တွေ ဘယ်တော့များမှ ပြည့်ရမှာလဲ...
မနက်ဖြန်တိုင်းကို မျှော်လင့်ရတာ တခါတခါတော့
စိတ်ကူးပင်လယ်မှာ လှေငယ်လေးမျောပါနေသလိုပါပဲ...
တချိန်ချိန်တော့ ပင်လယ်အောက်ပဲ ငုပ်လျှိုးသွားမှာလား
မျောပါနေရင်းနဲ့ပဲ ပင်လယ်ကြီးငြိမ်သက်သွားမှာလား

တချိန်ချိန်တော့ ... တချိန်ချိန်တော့ ... တချိန်ချိန်တော့ ... တချိန်ချိန်တော့ ...

ဆရာနီကိုရဲအတွက် အမှတ်တရ

ကျွန်တော်မရေးဘူး လုံးဝမရေးဘူးလို့ ဆုံးဖြတ်ထားတာ ခုတော့ ။ မနေ့ကပေါ့ ကျွန်တော့် ဘလော့ဂ်မှာ ဆရာမ မနော်ဟရီရဲ့ ပို့စ်အသစ်...“ကြွေလွင့်သွားတဲ့ ကြယ်တစ်ပွင့်” ဆိုတာကို တွေ့လိုက်တယ် ။ တွေ့တွေ့ချင်း စိတ်လှုပ်ရှားသွားတယ် ။ ဘယ်သူလဲဘယ်သူလဲပေါ့ ။ ဆရာနီကိုရဲ ကွယ်လွန်ခဲ့ပြီ ။ အရမ်းဝမ်းနည်းသွားတယ်။ စိတ်မကောင်းလည်း ဖြစ်သွားတယ် ။ အော်...ကျွန်တော်တို့လေးစားရတဲ့...ဆရာတစ်ယောက်ကြွေလွင့်သွားရ ပြန်ပြီလေ ။ ကောင်းကင်ကိုမော့ကြည့်လိုက်မိတယ် ။ အော်... ကြယ်တွေ ကြယ်တွေ ဘယ်နှစ်စင်းများ ထပ်ကြွေကြအုန်းမှာလဲ..(ဒီမှာတော့ ကြယ်မရှိတာများပါတယ်)။ ကျွန်တော် ကြယ်တွေကို သတိရရင်း “ကြယ်သေ” ဆိုတဲ့ ကဗျာကို ချရေးမိတယ် ။ ကျွန်တော် ကဗျာကို ကောင်းကောင်းမရေးတက်ပါ ။ အတတ်နိုင်ဆုံး ကြိုးစားပြီးရေးမိခြင်းပါ ။ ကဗျာကို အဆုံးသတ်လိုက်ချိန်မှာတော့ P.S မှာ ဆရာ့ကို ရည်ညွှန်းကြောင်း ရေးမလို့ပဲ ဒါပေမယ့် မရေးဖြစ်ခဲ့ဘူး ။ ကျွန်တော် ဆရာနဲ့ပတ်သတ်ပြီး အတိတ်ကို သတိရမိခဲ့လို့ပါ။

ကျွန်တော်တို့ G.T.C ကျောင်းသားဘ၀ကပေါ့ ။ နီကိုရဲကို စသိခဲ့တာ “ စိတ်အိုင်ပက်သူ” ဆိုတဲ့ ၀တ္ထု ၊ အဲဒီဝတ္ထုကို စဖတ်ကတည်းက စွဲသွားခဲ့တာ ။ ကျွန်တော့ဘေးက သူငယ်ချင်း တနေ့ အဲဒီစာအုပ်ကို ၀ယ်လာခဲ့တယ် ။ သူတောင်မဖတ်ရသေးဘူး ။ ငါခဏလေးကြည့်ပါရစေ ဆိုပြီးတောင်းကြည့်မိတယ် ။ ကြည့်ပြီးမှ အရမ်းဖတ်ချင်စိတ်တွေ တဖွားဖွားပေါ်ခဲ့တယ် ။ နောက်နေ့...သူ့ဆီက စာအုပ်ကိုရဖို့ ကျွန်တော် အမျိုးမျိုး ဖားခဲ့ရတယ် ။ နောက်တနေ့ မနက်အစောကြီး ကျွန်တော်ကျောင်းကို ရောက်နေခဲ့တယ်။ စာအုပ်လုဖို့လေ ။ သူငယ်ချင်းက ကျွန်တော့်ကို ပေးဖတ်တယ်...ဒါပေမယ့် အိမ်ကိုမငှားဘူး ကျောင်းမှာပဲ အပြီးဖတ်ခိုင်းတယ်...။ ကျွန်တော်ပျော်သွားတယ်...။ ဒါတောင်တခြားသူတွေက ကျွန်တော်ပြီးရင်ဖတ်ဖို့ စောင့်နေကြတယ် ။ ကျွန်တော် စဖတ်လိုက်တာ ဘယ်သူ့ကိုမှလဲ သတိမထားမိဘူး ။ အချိန် ဘယ်လောက်တောင်ကုန်လို့ ကုန်မှန်းလည်းမသိဘူး ။ အတန်းပထမအချိန်စတော့ ကျွန်တော် တော်တော်လေးကို ဈာန်ဝင်နေပြီ ။ စာသင်လိုက် စာအုပ်ကိုပြန်ဖတ်လိုက်နဲ့ စာကိုလည်း စိတ်မ၀င်စားတော့ ။ လက်ကလည်း မှတ်ထားတဲ့နေရာလေး ပျောက်မှာစိုးလို့၊ သူများလာလုမှာလည်း စိုးသေးတယ် ။ နောက်တော့ ကျွန်တော်ဘယ်လိုမှ မနေနိုင်တော့ဘူး...။ ကျွန်တော်ထိုင်တဲ့ ခုံတန်းကနောက်ဆုံးဆိုတော့ အခွင့်အရေး ရသွားတယ်။ ခေါင်းကိုငုံပြီး စာအုပ်ကို သည်းကြီးမဲကြီး ဖတ်နေမိတယ် ။ စာသင်သံတွေလည်း ဂရုမစိုက်နိုင်တော့ဘူး ။ ရုတ်တရတ် တတန်းလုံး အသံက အပ်ကျသွားရလောက်အောင်ကို တိတ်သွားတယ် ။ ဘာဖြစ်လဲမသိဘူးပေါ့ ။ ခေါင်းကိုဖြည်းဖြည်းချင်း မော့ကြည့်လိုက်တယ် ။ ဒေါသတ၀င်းဝင်းထနေတဲ့ ဆရာမရဲ့မျက်နှာ ကျွန်တော့်ရှေ့မှာ ခါးကိုထောက်လို့ ။ စာအုပ်ကို အမြန်ဖွက်လိုက်မိတယ်.. မမှီတော့ဘူး...။ “နင့်လက်ထဲကစာအုပ်ပေးစမ်း” တဲ့ ကျွန်တော် မပေးချင် ပေးချင်နဲ့ ပေးလိုက်ရတယ်...။ ဘေးကသူငယ်ချင်းက မျက်နှာရှုံမဲ့နေပြီ ။ “နင့်အပြစ်နင်သိလား” “ဟုတ်ကဲ့သိပါတယ်”  “သိရင်အတန်းချိန် ပြီးတဲ့အထိမက်တပ်ရပ်နေ” ကျွန်တော်စိတ်တော်တော်ညစ်သွားတယ် ။ တတန်းလုံးရဲ့ အကြည့်တွေက ကျွန်တော်ဆီရောက်နေတယ် ။ ကျွန်တော် ဂရုစိုက်ပါဘူး ၊ ဂရုစိုက်မိတာက စာအုပ်လေ ဆရာမပြန်မပေးရင် ဒုက္ခ ၊ ကျွန်တော်အရှိန်ကောင်းနေမှဗျာ။ ကျွန်တော့်အကြည့်က ဆရာမဆွဲခြင်းတောင်းထဲက စာအုပ်ဆီပဲ ရောက်ရောက်နေတယ် ။ ဘေးကသူငယ်ချင်းက ကျွန်တော့်ကို ငိုမဲ့မဲ့မျက်နှာနဲ့ ကြည့်နေပြီ ။ အတန်းချိန်ပြီးအောင် မနည်း သီးခံပြီးစောင့်နေရတယ် ။ စိတ်ကမရှည်ချင်တော့ ။ အဲဒီနေ့မှ ဆရာမကလည်း အတန်းချိန် ကျော်အောင်သင်နေတယ် ။ ကျွန်တော့်ကို အရွဲ့တိုက်တာလား မသိဘူး ။ အတန်းချိန် ပြီးသွားပြီ... ကျွန်တော်စိတ်ကိုတင်းလိုက်တယ် ။ ဆရာမနားကပ်သွားတယ် ။ “ဆရာမ ကျွန်တော့်ရဲ့ စာအုပ်လေး ပြန်ယူလို့ရမလား” “ ဘာ.............. မပေးဘူး...အေးလိုချင်ရင် ကျောင်းလွှတ်မှလာယူ” ကျွန်တော် ငိုချင်စိတ် ပေါက်သွားတယ် ။ ဘာမှ မတက်နိုင်တော့ ကျွန်တော့်အမှားကို... ။ သူငယ်ချင်းကို တောင်းပန်ရတယ် ။
“ ငါပြန်ရအောင်ယူပေးပါမယ်ကွာ .. ဘာမှစိတ်မပူနဲ့” လို့လည်းပြောရတယ် ။ အဲဒီနေ့က ကျွန်တော့်အတွက် အဓိပ္ပါယ်မရှိတဲ့နေ့ပေါ့...။ ဖတ်ပြီးသမျှတွေကို ပြန်တွေးမိပြီး ဘာလုပ်လို့ လုပ်ရမှန်းလည်းမသိဘူး ။ ကျောင်းမလွှတ်ခင်ကတည်းက ကျွန်တော် ဆရာများနားနေခန်းကို ရောက်နေပြီ ။ ဆရာမက လှမ်းခေါ်တယ် စာအုပ်ရပြီပေါ့ ။ ဆရာမက အသံကချိုချိုသာသာနဲ့ “သားစာအုပ်ကို မနက်ဖြန်မှယူတော့” ၊ ကျွန်တော် “ ဗျာ ” လို့ ထအော်လိုက်မိတယ် ။ “အေး...မင်းစာအုပ်က ကောင်းလို့ စွဲသွားပြီ ဆရာမဖတ်ချင်လို့ အိမ်ကိုယူသွားမယ် ..မနက်ဖြန်မှပြန်ယူ ..ဒါပဲ” တဲ့ ။ ကျွန်တော့်နားနေခန်းထဲက အလိုမကျချင်းများစွာနဲ့ ထွက်လာမိတယ် ။ သူငယ်ချင်းကတော့ ပြောလိုက်တာ မိုးမွှန်နေတာပဲ ။ ကျွန်တော်အရမ်းကြိုက်မိတဲ့ စာအုပ်ကိုမှ ဘာလို့ အေးအေးဆေးဆေး ဖတ်ခွင့်မရခဲ့တာလဲ ။ မတတ်နိုင်ဘူးလေ နောက်နေ့ပေါ့ ။ ဒီလိုနဲ့ နောက်နေ့မှာ ဆရာမဆီက စာအုပ်ပြန်ရခဲ့တယ် ။ အဲဒီနေ့က ကျွန်တော် အတန်းမတက်တော့ဘူး...၊ ကျောင်းပန်းခြံထဲမှာ တစ်ယောက်တည်း စာအုပ်ဆုံးတဲ့အထိ ဖတ်ဖြစ်လိုက်တယ် ။ ကျွန်တော်အရမ်းကျေနပ်သွားတယ် ။ အရမ်းကောင်းတဲ့ ၀တ္ထု ၊ လူငယ်တွေရဲ့စိတ်ကို စွဲသွားစေခဲ့တယ် ။ အခက်အခဲတွေကြားထဲက ဖတ်ခဲ့ရတာကို မမေ့နိုင်ခဲ့ဘူး ။ အဲဒီကတည်းက ကျွန်တော့်ဘ၀မှာ ဆရာနီကိုရဲ ကအမှတ်တရဖြစ်စေခဲ့တယ် ။ နောက်ပိုင်းအဲဒီစာအုပ်ကို Title အသစ်နဲ့ ရုပ်ရှင်ပြန်ရိုက်တာ သိလိုက်ရတယ် ။ ကြည့်ချင်ပေမယ့် မကြည့်ဖြစ်ခဲ့ဘူး ။

မနေ့ညကဆရာအတွက် ကြယ်နေရာက ခံစားရင်း ကဗျာရေးမိတော့မှ အတိတ်ကို အမှတ်ရစေခဲ့တယ် ။

ဆရာက..

ကလောင်သွားထက်ထက်နဲ့ စာတွေသီကုံးခဲ့တယ် ။

ဘ၀ကို စာအလှတွေနဲ့ ဝေမျှခဲ့တယ် ။

ခုတော့ ... အကြွေစောခဲ့ပြီ ။

ဆရာကောင်းရာမွန်ရာဘ၀သို့ ရောက်ပါစေ လို့အစဉ် ဆန္ဒပြုလျက်...

အိုင်ဒီယာမဂ္ဂဇင်း လ (၁၀၀) ပြည့်မှာ နောက်ဆုံးပါသွားတဲ့ ဆရာ့ဝတ္ထုတိုလေးကို ဖတ်ကြည့်စေချင်၍ ဆရာမ မနော်ဟရီရဲ့ လင့်လေးကို ထည့်ပေးလိုက်ပါတယ်။

ကျွန်တော် . . . . . . . . နှင့် ဘတ်တာဖလိုင်းဆရာမ

(ဆရာနီကိုရဲအတွက် အမှတ်တရအဖြစ် နောက်ပြီး ကျွန်တော့ဘ၀ထဲကို ဆွဲသွင်းပေးခဲ့တဲ့ သူငယ်ချင်း၊ ကျွန်တော့်ကို အမှတ်တရဖြစ်အောင်လုပ်ပေးခဲ့တဲ့ ဆရာမ အားလုံးကို သတိရလျက် ဒီပို့စ်လေးကို ရေးလိုက်ရပါတယ် )

စာပေအနုပညာကို အစဉ်လေးစားလျက်... 

ကြယ်သေ ***

နက္ခတ်စုံစီ   အရီရီနှင့်

ရှစ်ခွင်ပတ်လုံး   မိုးသားလုံးတို့

မခို့တစိတ်   ပြုံးရိပ်သန်းရောင်

လရောင်ကွေးကွေး   သူ့နဘေး၌

ဝပ်ဆင်းခယ   ယှဉ်တွဲကြတဲ့

သန်းခေါင်ယံည   စစ်ခင်းပွဲမှာ ...

ကြယ်ဓူဝံက   အထီးတည်းနှင့်

တည်ရှိမှုကို   ကိုယ်စားပြုဧ။် ။

ကြယ်စင်ညီနောင်    ခုနစ်ကောင်က

သန်းခေါင်လှနှင့်   ဖင်ထောင်ကလို့

အရောင်မယွင်း   စုစည်းခြင်းဖြင့်

ကကြိုးရင်းကို   တမျိုးခင်းဧ။် ။

ကြယ်စင်အလှ   အိုရီယွမ်က  

ချစ်သင်္ကေတ   သစ္စာလှကို

သဘာဝနှင့်   ယှဉ်တွဲပြဧ။် ။

ကြယ်စင်အားလုံး   အစုရုံးနှင့်

သူတို့စွမ်းစ   ပင်ကိုလှကို

မရမက   ထုတ်ပြကြဧ။် ။

အဝေးတနေ   ကြယ်စင်သေက

ကပြရမယ့်   စစ်ခင်းပွဲမှာ

သူ့ထက်စွမ်းကား   သာလွန်ချည်းမို့

တခြမ်းပဲ့တဲ့   သူ့သက်တမ်းကို

ဘယ်လိုစခန်း   သွားရအံ့ဟု

ကြွေရပင်လျှင်   မြတ်လှချေဧ။်

လူတို့တောင်းဆု   ပြည့်နိုင်မှုကြောင့်

အားမှမတန်   မာန်ကိုအလျော့

ကမ္ဘာမြေတွင်း   သွတ်သွင်းလိုက်မယ်

နောက်ဆုံးအလှ   ငါ့ဘ၀ကို

ကြယ်စင်အားလုံး   ခံစားရင်းဖြင့်   သံဝေဂယူကြလော့ ။ ...

(Orion = မောင်ရင်ဆိုင်းထမ်းကြယ်)
(ဘာရယ်မဟုတ်ပါဘူး ကောင်းကင်ကိုကြည့်ရင်းနဲ့ ကြယ်တစင်းကြွေကျတာကို သတိရမိလို့ပါ)

သတိရပါ

သံစဉ်ပျက်နေတဲ့ ဂစ်တာတလက်
ကာရန်ညှိမယ့် ကြိုးတွေနဲ့
တီးခတ်မယ့် သူကိုမျှော်နေလေရဲ့ ။

အရှေ့မှာတော့ ငရဲသားတွေက
အတွေးမှားအောင် ရန်ထောင်နေကြတယ် ။

ဘ၀ဆိုတာ မလှပတာလူတိုင်းသိတယ်
ရတာမရတာတော့ အပထား
လက်တကမ်းက ပန်းအလှကို
တမ်းတချင်ကြတာပဲ ။

ဘာကြောင့်လဲ
နားရည်ဝမယ့် စာသားအလှတွေနဲ့
ပါးစပ်ဖျားက သေမလောက်ပြောလဲ
ကြွေမသွားလောက်ပါလား ။

စဉ်းစားကြည့်ပါ
ပန်းတစ်ပွင့်ရဲ့ ဒိုင်ယာရီမှာ
အချစ်ဆိုတဲ့ ကဗျာဟာ
မရေရာပေမယ့် သေချာတာက
ဒဏ်ရာဆူးနက် တချက်ထိရင်
ဘယ်လောက်ခံရခက်မလဲ ။

သွားချင်ရင်သွားပါ
မလှပနိုင်ပေမယ့်
ဥယျာဉ်မှူးတို့ဘ၀
ပျိုးခဲ့တဲ့ပန်း လန်းခဲ့ရတယ်ဆို
ပန်းပျိုးလက်တဖက်နဲ့တောင်
အသက်ဆက်နိုင်ပါသေးတယ် ။

ဒါပေမယ့်
သစ္စာတွေအပ်
မေတ္တာတွေ အထပ်ထပ်ခင်းခဲ့တဲ့
ပန်းပျိုးရက် ဘ၀တစ်သက်ကို
အမုန်းမိုးစက်တွေနဲ့တော့
ရင်ဝတဖက်တချက်ကို
သေရခက်အောင် မစူးစိုက်ခဲ့ပါနဲ့
သံစဉ်ပျက်နေတယ်ဆိုတဲ့ ဂစ်တာပျိုရယ် ။

သွေးလှူဒါန်းမိသည့်အခါဝယ်

လောကတွင် ကိုယ်ခန္ဓာမှ တခုခုကို ထုတ်ယူလှူဒါန်းခြင်းသည် မွန်မြန်သောအလှူဟု ဆိုကြပါသည်။ ထိုအထဲတွင်မှ သွေးလှူဒါန်းခြင်းကား မိမိဧ။်သွေးဖြင့် မည်သူမည်ဝါမှန်းမသိသော လူအသက်ပေါင်းများစွာကို အသက်ဆက်စေနိုင်သည့် အတွက် သွေးလှူဒါန်းခြင်းသည်ကားလည်း မွန်မြတ်လှသောအလှူဖြစ်ပါသည်။

ဒီနေ့ ကျွန်တော်လှူဒါန်းခဲ့သော အလှူကိုသာဓုခေါ်စေနိုင်ရန်နှင့် စင်ကာပူတွင် ရောက်နေကြသော မောင်နှမတို့အား သွေးလှူဒါန်းခြင်းအမှုကို ပြုနိုင်ရန် ယခုပို့စ်လေးကို နှိုးဆော်ရေးသားလိုက်ရပါသည်။

တကယ်ဆိုရင် ကျွန်တော်စင်ကာပူရောက်ပြီး သွေးလှူတာ ယခုအကြိမ်နှင့်ဆို ၂ ကြိမ်ရှိခဲ့ပါပြီ။ အရင်ရက် တွေကတည်းက နောက်တစ်ကြိမ်သွေးလှူလို့ရနေပါပြီ။ သူငယ်ချင်းတွေမအား၍တကြောင်း၊ သူတို့အားတဲ့ စနေ၊ တနင်္ဂနွေက ကျွန်တော်မအား၍ တကြောင်း မသွားဖြစ်ခဲ့ခြင်းပါ။ ဒီနေ့တော့  ရောက်အောင်သွားမယ်ဆိုပြီး တစ်ယောက်တည်းပဲ ထွက်လာခဲ့လိုက်တယ်။ ကျွန်တော် HSA (Health Sciences Authority) ရှိရာ Outram Park MRT ကိုရောက်တော့ နေ့လယ်ဖြစ်နေပြီ။ တစ်ယောက်တည်းလမ်းလျှောက်လာရင်း Blood Bank ထဲကို ၀င်လိုက်တာနဲ့ ကျောင်းသားကျောင်းသူလေးတစ်ဖွဲ့ ကိုတွေ့လိုက်ရတယ်။ သူတို့အားလုံးပျော်နေကြတယ်။ ကျွန်တော်လှမ်းကြည့်လိုက်တော့ သူတို့ပထမ အကြိမ်လှူဒါန်းခြင်းဆိုတာ လက်မောင်းက First Time ဆိုတဲ့ စတစ်ကာလေးတွေကနေ သိလိုက်ရတယ်။ ရင်ထဲမှ သာဓုခေါ်လိုက်မိပါတယ်။ ပထမဆုံး ကောင်တာမှာ ဖောင်ယူပြီး သူတို့မေးထားတဲ့မေးခွန်းလေးတွေကိုဖြေရတယ်။ နောက်ပြီးစစ်ဆေးတဲ့ဆရာဝန်က မြန်မာဖြစ်နေတော့ ပိုပြီးအဆင်ပြေသွားတယ်။ မသိနားမလည်တဲ့ မေးခွန်းတွေကို မေးခွင့်ရလိုက်တယ်။

စစ်ဆေးပြီးတဲ့ အခါမှာ နောက်ကောင်တာတခုမှာ သွေးစစ်ရတယ်။ နောက်ဆုံး သွေးလှူဒါန်းမယ့် အခန်းထဲကို ကျွန်တော်ဝင်လာခဲ့တယ်။ ပစ္စည်းတွေက အားလုံးတခါသုံးတွေပါပဲ။ လက်အိတ်ကအစ တခါသုံးရာဘာလက်အိတ်တွေနဲ့ သန့်ရှင်းမှုတော့ တော်တော်ရှိပါတယ်။ ထူးထူးဆန်းဆန်းအံ့သြစရာ ကြုံရသေးတယ်ဗျ။ ကျွန်တော့်ကို သွေးထုတ်ပြီး ၄ မိနစ်ပဲရှိသေးတယ် တစ်ပုလင်းပြည့်သွားတယ်။ ထုတ်ပေးတဲ့နပ်စ်ကအံ့သြနေတယ်။ ခင်ဗျားသွေးအား တော်တော်ကောင်းတာပဲလို့တောင် ပြောသွားသေးတယ်။ သွေးလှူဒါန်းပြီးတဲ့ နောက်မှာတော့ ဆေးရုံကနေ မိုင်လိုတခွက်နဲ့ မုန့်တခု၊ ပဲဟင်းချို တခွက်ကို တိုက်ပါတယ်။ သွေးအားအမြန့်ပြန်ပြည့်စေမယ့် ဆေးတွေလည်းပေးလိုက်ပါတယ်။ နောက်ဆုံး ကျွန်တော်ဆေးရုံကနေ ပြန်လာတော့ ဆေးရုံဝင်ပေါက်ဝကို ပြန်လှည့်ကြည့်ရင်း အတွေးဝင်လာခဲ့တယ်။

အဲဒါတွေကတော့

(၁) သွေးလှူဒါန်းခြင်းကား မွန်မြတ်သောအလှူဖြစ်ခြင်း။

(၂) မိမိကသွေးကိုထုတ်လိုက်သည့်အတွက် သွေးအသစ်ကိုပြန်ရပြီး Blood Circulation ကိုပိုကောင်းစေခြင်း။

(၃) သွေးလှူဒါန်းရမည့် အတွက် ကျန်းမာရေးကို ပိုဂရုစိုက်မိခြင်း။

(၄) မိမိဧ။်သန့်သောသွေးကိုသာ လှူဒါန်းချင်သည့်အတွက် အပျော်အပါးလိုက်စားဖို့ရန်ပင် ၀န်လေးလာခြင်း။

(၅) မိမိဧ။်ကျန်းမာရေးနှင့် မိမိဧ။်ဘ၀ကို ယုံကြည်စိတ်ချမှုရှိလာခြင်း။

စသည့် အခြားခြားသော ကောင်းကျိုးတွေကို ရရှိနိုင်ပါလားလို့။

ထို့ကြောင့် စင်ကာပူတွင်ရောက်နေကြသော မောင်နှမများအား သွေးလှူဒါန်းချင်ပါက လှူဒါန်းနိုင်စေရန် ဒီပို့စ်လေးဖြင့် နှိုးဆော်လိုက်ရပါသည်။

သွေးလှူဒါန်းရမယ့် လိမ်စာက

Bloodbank@HSA

Blood Services Group

Health Sciences Authority

11 Outram Road,near by Outram Park MRT

Singapore 169078

Tel: 6213 0626 / 6223 5640 Fax: 6222 0085

လှူဒါန်းနိုင်တဲ့ အချိန်တွေကတော့

အင်္ဂါ - မနက် ၉ နာရီမှ ညနေ ၆ နာရီခွဲထိ

ဗုဒ္ဓဟူး - မနက် ၉ နာရီမှ ညနေ ၆ နာရီခွဲထိ

ကြာသာပတေး - မနက် ၉ နာရီမှ ညနေ ၆ နာရီခွဲထိ

သောကြာ - မနက် ၉ နာရီမှ ည ၈ နာရီထိ

စနေ - မနက် ၉ နာရီမှ ညနေ ၄ နာရီခွဲထိ

တနင်္ဂနွေ - မနက် ၉ နာရီမှ နေ့လယ် ၂ နာရီထိ

ဒီမှာလေ့လာနိုင်ပါတယ်

(အားလုံးပဲ ကုသိုလ်ဖြစ်ရာဖြစ်ကြောင်း လက်ဆင့်ကမ်းပေးကြပါလို့ တိုက်တွန်းပါရစေ)